Press Tour a kal tur chanchinbumi te, Mizoram Journalist Association hruaitute leh I&PR hotute vawiin chawhnu khan I&PR Director Pu Jim K. Chozah pisa-ah an inkawm.

I&PR Director chuan chanchinbumi Press Tour a kal turte duhsakna hlanin Mizoram mipuite tana hlawkna he an zinna atang hian an chharchhuah ngei a beisei thu a sawi a. Nuam tawl tura kal ni lovin Mizoramin kan mamawh zir chhuak tura kal an nih inhria a an zin chhung zawngin an rilru put dan chulam hawi anih theihna turin a fuih a ni.

MJA President Pu H. Zosangliana pawhin ziakmi Journalist te mamawh chu an hriatna tipung tura khaw hawi zau a ni tiin sawrkarin chanchinbumi te zinna tur remchang a siamsak thin chu lawmawm a tih thu a sawi a. He Press Tour hlawhtlinna tur hian Mizoram mipui te chhiar chanchin ngaihnawm leh pawimawh tak tak an rawn hawn ngei a beisei thu leh an lo thlir reng tur thu a sawi bawk.

Press Tour a kal tur te hi pawl hniha then niin an vaiin chanchinbumi 14 leh I&PR Officer pahnih an nih a. Pawl khat hi Sikkim lamah kalin pawl dang hi West Bengal-ah an kal thung ang. West Bengal lama kal tur Lalnunmawii IPRO, Lalbiakzama, Sangsuakthanga, H Lalchhandama, F Lalngaihzuala, Elvis Lalthangzuala, Kapliana Pachuau leh R D Darthanzauva te an ni. Sikkim lama kal tur ve thung chu N. Vabeiratlua IPRO, H Laldinmawia, H Lalngaihawma, Lalremruata, Ricky H Vanlalnghaka, H Vanlalnghaka, Lucas Thangmangliana leh Lalnunkima Pisa te an ni.

Press Tour a kal turte hi Jim K Chozah Director I & PR leh H Zosangliana, President, MJA ten naktuk zing dar 10 :30 AM ah I & PR Office kawt atangin an vailiam ang.