Khawvel hmundangte rualin vawiin khan Mizoramah Siktuithiang Kut (World Water Day) chu ropui takin hman a ni a. He ni pual hian intihsiakna hrang hrang buatsaih a nih bakah lirthei ke pahnih nei a ruala tlan (two wheeler rally), College zirlai te ke a kal (Walk for water) te, Painting and Photo Exhibition-te neih a nih bakah Public Health Engineering (PHE) enkawltu Minister Pu S Hiato hovin Vanapa Hall-ah inkhawm urhsun tak buatsaih a ni.

Siktuithiang Kutpa Pu S Hiato chuan he kutin a tum ber chu awmze neia tui hman leh enkawl kawnga mi zawng zawng lungrual taka thawh ho a ni tih sawiin khawvel pumah kumin kut thupui atan Tui Lama Thawhhona (Water Cooperation) tih chu thlan a ni a, kumin hi United Nations chuan International Year of Water Cooperation - Tui Lama Khawvel Thawhho Kum atan a puang a ni, a ti. Tui lova dam khawchhuak theilo mihring te kan pung zel a, tui mamawhna a let tam takin a sang a, kan chenna khawvela tui awm zat erawh a kiam zel si a. Heti taka mamawhna a san avang hian tui hian ram, khua leh veng inkar buaina hial a thlen thei a ni tiin buaina thlentu ni lova remna, thawhhona leh in unauna siam tu atan kan hman thiam a tul ta hle a ni, Minister chuan a ti bawk. Lo vat leh hala eizawng Mizo te hian ramngaw kan thiah zel avangin tuihna a kang chat mek zel a, tui a harsat tawlh tawlh laiin renna chang hre lo kan puang tual tual hi a manganthlak takzet a, tuihna kang chat mek theihtawp chhuaha ven leh renchem hi tih makmawh kan chunga tla a ni, a ti. Minister chuan tuihna kang chat veng tura Mizorama tlawmngai pawl lian ber YMA leh PHE Dept ten thawhhona tha tak an nei chu lawmawm tiin mipui te hian tuihna humhalh tur a awm tawh loh hun kan thlen hma hian a humhalh hna hi mitin mawhphurhna a ni tih hre thar turin a chah a. Siktuithiang Kut hmang tu zawng zawng te chu an thil hriat thar te hawn a, a taka hmang tu leh midangte hrilh hre tu nih tum theuh turin PHE Minister Pu S Hiato chuan a sawm a ni.

He huna thusawitu dang Parliamentary Secretary Pu H Zothangliana chuan tui thianghlim khawm khawp neih chhunzawm zel theih nan tui awmze nei taka hman a tul tawhzia leh chumi kawnga mi zawng zawng lungrual taka an thawhho theihna turin United Nations General Assembly kum 1992 a neih chuan March 22 hi World Water day atan a ruat a, kum 1993 atang khan khawvel pumah he ni hi hman tan a lo ni ta a ni, a ti. PHE leh CYMA chuan Mizoram khawpui hrang hrangah tuihna humhalh leh tui renchem a tul zia zirtirna a pe mek zel a, heng te hian rah tha tak a chhuah a beisei thu Parliamentary Secretary chuan a sawi a ni.

Keynote Address sawitu PHE Principal Secretary Pu Lalram Thanga pawhin khawvel puma tui renchem a tulzia, tui thianghlim intur a kam chakzia leh tui avanga ram leh ram, khua leh khua inkara innghirnghona a chhuah mekzia a lem nen a entir a. Khawvel mithiam hmingthang leh khaw thlir thui tak nei ten an hmuh danin tui renchem leh humhalh kawnga hma kan sawn lohva, tun ang zela tuihna a kang chak a nih chuan ram leh ram inkarah tui inchuh avangin indona hial a la chhuak thei mai dawna a lan thu Principal Secretary chuan a tarlang a ni.

Siktuithiang Kut pualin inelna hrang hrang buatsaih a ni a. zoSan Slogan inziahsiakah “Nang i fai chuan khawtlang a fai ang; Khawtlang a fai chuan Ram a fai ang” tih ziaktu Jacob Malsawmtluanga, Lallen khua chu pakhatna a ni a; waterWISE slogan inziahsiakah “Tuihna ngaihlu tu chuan nunna a ngaihlu a ni” tih David J Lalfakzuala, Ramthar Lunglei ziak chu pakhatna a ni a; hla inphuahsiakah “Siktuithiang Ngei” tih hla phuahtu Lalmuanchhana, E. Lungdar chu pakhatna a ni a; lemchan thawnthu inziahsiakah Lalchuangliana, Electric Veng ziak “Tui Palai” tih chu pakhatna a ni a; feature film insiamsiak waterVISION-ah “Hun Thim 2070” tih hmangin Dawrpui Vengthar Salvation Army Youth chu pakhatna an ni a; waterPRINT ah Liankunga Ralte, Sihphir chuan lawmman pakhatna a dawng a; waterAds-ah Salemthara chuan lawmman pakhatna a dawngin ‘ Tuihna hi kan humhalh tha tawk a ni’ tih thupui hmanga debate-ah Govt. Aizawl College chu pakhatna an ni a, Best Debator ah Ngurnuntluanga chu thlan a ni.