Kumin kumtawp lam hian Mizoram chuan MLA Election, 2018 kan hmachhawn dawn ta a. Inthlanna felfai leh muanawm a awm theihna turin kawng hrang hrang a hmalak chhoh mek zel a ni. Inthlanna muanawm kan neih theih na tura thil pawimawh em em mai pakhat chu Silai (Arms) Police Station a tun hi a ni. Kan Silai te kan Huan leh Lo te venhimna atana a pawimawh em em rualin, a thalo zawnga mite rikrapna atana hman theih a ni a. Chu chu hria in, Election Commission of India chuan Election hma ngeiin Silai neitu zawng zawng ten an Silai te an awmna atanga Police Station emaw Police Outpost emaw hnai berah an tung vek tur a ni tiin thupek a siam a.
Chutiangin DEO, Siaha District pawhin Sec.144CrPC tlawhchhanin Dt 31.8.2018 khan Silai neitu zawng zawng ten an awmna hnai ber Police Station emaw Police Outpost emaw ah inthlanna muanawm a awm theihna turin an Silai an tung vek tur a ni, tiin thupek a chhuah ta bawk a.
He thupek zawm lo a Silai tung duhlo leh an Silai dan lo a lekchhuak te chungah hremna Lungin tan, Pawisa chawi leh Silai Licence cancel sak thleng a pek theih a ni. Khua leh tui tha kan nih ang ngeiin, Siaha District chhunga inthlanna muanawm tak kan neih theihna turin Siaha Police chuan Silai neitu zawng zawng kan Silai te tung theuh turin kan inhriattir in kan in ngen tak meuh a ni e. Thupek zawm hi khua leh tui thate tihtur a ni tih pawh i hre thar leh ang u.
