Vawiin khan Sericulture Minister Pu Nihar Kanti Chakma chuan Sericulture Conference Hall-a inkhawm buatsaihah Silk tha chi thar chhuah theihna tur “Bivoltine Cluster Project” a hawng.
Minister chuan project pawimawh tak mai hawn a ni thei ta chu lawmawm a tih thu sawiin, he Project chhawr tangkaitur pangang khawi a kuthnathawktu te chu tih tak zeta thawk tur leh teirei peih turin a chah a. “Mi ti tak tak leh taima chu sawrkarin a tanpui peih reng a ni”, a ti a. Sawrkar dept. lama mithiamte nen thawhhona tha tak nei turin a fuih bawk. Kuthnathawk kal khawm te chu tanpuina chauh duh lo a hlawhtling ngei tur a thawk tur leh tanpuina an dawn te chu a nihna ang tak a hmangturina chah a. He project hlawhtlinna pawh a thawktu te kutah a awm ani tiin, rinawm leh taima taka thawk turin a chah bawk.
He Project hawnna inkhawmah hian Central Silk Board a member lo ni tawh Pi M.Sathiyavathy, IAS, Addl. Chief Secretary chu khualzahawm a ni a. Pi M. Sathiyavathy chuan Mizoram sik leh sa awmdan chu pangang khawi nan a tha a ni tiin, tih takzet a bawhzui anih chuan silk siam chhuak tam ber a ni thei a ni a ti a. Amaherawhchu Mizorama pangang khawituten tunlai khawl tha leh thiamna an tlakchham deuh avangin silk quality tha zawk leh tam zawk an siamchhuak thei lo chu, tan lakna lai tur ani tih sawiin, hemi lama tan la turin department ho tu te chu a ngen a ni. Dept. hotu te chu sericulture lama mithiam ruai tam tura ngenin, pangang khawitu te chu state danga training a tirchhuak tam turin a ngen bakah district tina ‘reeling unit’ dah dan ngaihtuah turin a ngen bawk. ‘Sericulture Clinic’ siam tur leh mipui hnenah zirtirna pe tam turin a chah bawk.
He Project hawnna inkhawm hi Pu C.Lalthankhuma Secretary, Sericulture Dept. in kaihruaiin, Pu Surat Deori, Jt.Secy Central Silk Board, Regional Office, Guwahati in he Project kalpui tum dan leh silk tharchhuah lama Mizoram dinhmun te an sawi a. Pu Moncy Issac, Deputy Secy, Central Silk Board, Bangalore in XII Plan hnuaia silk tharchhuah lama a hmachhawp te a sawi a ni. Pu Donatus Engzananga, Sericulture Dept.,Director in he hun hman a nih chhan te a sawi a ni. Pangngang khawitu te atang an dinhmun leh harsatna tawh te ngaihthlak a ni a, Pu Lalrinmawia Jt.Director Sericulture Dept. in lawmthu sawina in he Project hawnna inkhawm hi a khar a ni.
Chawhnu lamah sawihona hun leh Project zirchianna hun neih ani.
He “Bivoltine Cluster Project” hi Aizawl District-ah tan phawt a ni a nga, mi 300 chu he Project kalpui tura thlanbik an ni. He Project kaltlang hian khawvel pum huap pawh a silk tha ber chi tharchhuah teuh theih beisei a ni.
