Chief Minister Pu Lal Thanhawla chuan 'sim tur kan neihte hi sim mai tur a ni' ati. He thu hi vawiina Chanmari YMA Halla World No Tobacco Day hmanna a a sawi a ni.

Chief Minister chuan he ni hi ni pawimawh tak a ni a ti a. Mizoramah vaihlo leh a kaihhnawih dona hi kum 20 liam ta atang khan Indian Society on Tobacco & Health Mizoram Chapter in fahrahte a bul alo tan chu, mi te ngaihven hlawh vaklo chunga kal chho zelin, tunah chuan hriat a hlawh ta hle a, a lawmawm hle a ni a ti a. Zuk leh hmuam thatlohna hi nasa taka sawidarh leh zirtir ani hi azawm leh zawm lohah mahni kut theuhah a awm a ni a ti a. Zuk leh hmuam hi insum angai lova, kan sim mai tur a ni a ti. Chuvangin kan taksa a Pathian chawimawi tur kan nih chuan kan taksa hi a thianghlim tur a ni a, sim tur kan neihte kan sim mai tur a ni a ti.

Mizote hian hriselna ngaihpawimawh (health conscious) nachang kan hriat a hun hle tawh a ni Pu Hawla a ti a. Ringtu kan nih chuan kan pawnlam nun leh kan chhunglam nun a thianghlim tur a ni a ti.Vawina World No Tobacco Day hmanna hian vaihlo leh kaihhnawih hlauhawmzia thehdarh a, kan hriatzau deuh deuh ngei a beisei thu a sawi bawk a. Hla satute hla thu chu min tiphurtu an ni a, kumdang zawng aiin a hlimawm hle a ni a ti.

Indian Society on Tobacco & Health Mizoram Chapter President Pi Lal Riliani chuan khawvel pumin an hman ruala he ni lawmawm tak Mizoramah kan hmang ve hi a lawmawm tak zet a ni a ti a. Hemi ni in a zuk hrilh tum, a target te, thalai zirlai naupang zawkte thahnem tak an tel thei chu lawmawm a tihthu a sawi a.Zuk leh hmuamah zirlai te an lo fihlim theih nan, an role model zirtirtute chu an nun an uluk a tulzia school naupang anih laia alo tawnhriat tawh thu a sawi a. Meizial zukte, khaini hmuam leh gutkha chhuak te reng reng hriselna tichhe thei leh kan nun titawitu anihzia uar tak leh thiam takin a sawi a ni.

Pu S.Laldingliana, Parliamentary Secretary, Khualzahawm pawhin thusawiin, kan pi leh pute atangin vaihlo leh tuibur intheh thin hi kan hnamzia a bet tlat anga kan ngai thin hi, tunlaiah chuan vaihlo leh a kaihhnawih thatlohzia hrechiang ber tu kan ni tawh a ni a ti a. Meizu mite chu khawvel hmun tinah an chep tawh hle a ni a ti.Hei hian meizuk pawizia a tilang chiang hle a ni a ti.

Inkhawm kaihruaitu Pu K.Lalnghinglova, Secretary, Health chuan sikret leh khaini siamtu te hian hmarchhak state, Mizoram tiamin an thilsiam hi an rawn thawnluh nasat bik zia sawiin Delhi ah chuan lei tur a vang hle a ni a ti a, hei hian khawpui zawkte chu hetiang thil hrisel lovah fihlim an tum hle tih a tilang a ni a ti.

Inkhawmah hian Mizoram State Tobacco Control Society buatsaihin Pu S.Laldingliana,Parliamentary Secretary chuan Pi Lal Riliani hnenah Thuziak Citation a hlan a, Chief Minister hian Vaihlo Dona Hla Compact Disk a tlangzarh bawk a ni.