Singlung Hills Council thla ruk dang pawhsei hnua, Sawrkar in a Council Member tura a ruat thar leh mi 14 te chu Aizawl DC Office ah rinawmna thutiam ‘Oath of Affirmation’ an la a. SHC Member te rinawmna thutiam hi Aizawl DC charge la mek Pu V.L. Hruaizela Khiangte in a tiam tir a ni.

Mizoram Governor chuan Singlung Hills Council hun lailawk ‘Interim Period’ chu January ni 8, 2019 khan thla ruk dang atan a pawtsei a, hemi behchhan hian Sawrkar in Singlung Hills Council Member 14 awmna tur thuchhuah chu January ni 18 khan a chhuah a. Vawiin khan heng Member 14 te hian rinawmna thutiam ‘Oath of Affirmation’ an la a. Member thar te chu – Chief Executive Member Pu Lalthlamuana Hmar; Chairman Pu Lalmalsawma Darngawn; Deputy Chairman Pu Lalbiaknunga; Executive Member – Pu Lalrosiem; Pu Ngurhrangkima; Pu R. Lalfakzuala; Nl. Melody Lachhuangzeli  te; Member – Pu D. Hmangaiha; Pu H. Lalengzuava; Pu Lalruatliana; Pu Zahmingliana; Pu H.C. Lalmalsawma leh Nominated Member – Pu Rodingliana leh Pu Kawlremthanga te an ni.

Thutiam an lak zawha Singlung Hills Council, Chief Executive Member Pu Lalthlamuana Hmar chuan thusawiin an mawhpurhna lian ber chu he hun chhunga inthlan neih hma an ni ti a. An bial chu bial hmasawn lo tak nih avangin Member te chu bial hmasawnna atan theihtawp chhuah turin a sawm a ni. Addl DC Pu V.L. Hruaizela Khiangt pawhin thu tawi sawiin hmasawnna nei turin inlungrual leh thawhtlan a pawimawh a, a chhia leh a tha inhrilh tawna a hma lak a tul a, leh kawng engkim infinchhuah in hmasawnna a thlen tir thei a ni, a ti. SHC, Development Officer Pu Lalchungnunga chuan Member te chu thawhhona tha tak an nei a beisei tih a sawi.