Nimin (6th February 2019) atang khan ni thum chhung awh turin South Tuipui Assembly Constituency bialtu MLA leh Health & Family Welfare Department, Higher & Technical Education Department leh Commerce & Industries Department changtu Minister ni bawk Dr R. Lalthangliana chuan a bial chhung khaw hrang hrang a fang kual mek a. Niminah Hnathial, Tarpho, Khawhri leh Thingsai khua te tlawhin vawiinah Bualpui H, Cherhlun, New Ngharchhip leh Ngharchhip te a tlawh a. Heng khua ah te hian hmasawnna hnathawh tul hrang hrang a hmunah enfiahin sawrkar official-te leh khawtlang hruaitute hmalak dan tur a sawipui.

Thingsai VC House kawtzawla a puala hun hmannaah Minister chuan Mizorama khaw pawimawh tak mai inkalpawhna kawng that loh avanga tlawh pawh hleihtheih lova a awm chu pawi a tih thu a sawi a. A bial chhung ti hmasawn turin inkalpawhna kawng tha tak siam chu hna hmasaa neih a tum thu sawiin Thingsai khaw panna kawng pahnih - short cut road leh kawng thar siam thatna turin cheng Nuai 190 ruahman a nih tawh thu leh a siam that hna hi kalpui thuai a nih tur thu kalkhawmte a hrilh a. Socio-Economic Development Policy (SEDP) chungchang pawh sawilangin Minister chuan he hmalakna in a tum ber chu ei leh bara intodelhna, vantlang nun tha, mipuite hlimna leh ngelnghetna siam a ni, a ti a. He Socio Economic Development Policy (SEDP) hnuaiah Commerce and Industries Department kaltlangin Thingsaiah Myanmar nena insumdawn tawnna Border Trade hmalakna kalpui a nih tur thu tarlangin Tiau kawng pawh siam a ni dawn a ni, a ti a. Helai hmunah hian Trade Center changtlung tak din tura hmalak a tum thu sawiin Mizoramin awmze nei zawka Border Trade a kalpui dan tur ngaihtuah turin sawrkar laipui official-te a dawr mek thu a sawi bawk.

Bualpui H, Cherhlun, Ngharchhip leh New Ngharchhip ah te pawh mipui thahnem takin lo hmuakin inkawmhona hun hman naah  hmasawnna mamawh mipuiten a hnena an lo thlen hengte - Sub Centre leh ruhrel dang tih changtlun, tui supply tha leh zirna tih hmasawn, community hall sak that, kawngpui leh link road siam that, mi harsa zualte hnena damdawi a thlawna sem chhuah, doctor, nurse leh zirtirtute posting kawngah te hmalak a tum thu a sawi a. Rinawmna, taimakna leh tih tak taka beihna nen sawrkar hmalakna te thahnemngai taka tawiawm turin mipuite a chah.

Minister chuan Hnahthial District ti puitling ngei turin March thlaa Budget Session-ah ngaihtuah ani dawn a ni, a ti a, hei hian Hnahthial leh a chhehvel ah hmasawnna nasa tak a thlen dawn a ni, a ti a. Ram hmasawn tur chuan MLA leh mipuite an inpawh that a tul a ni tiin Minister chuan bial leh ram hmasawnna tura rawtna an neih te sawi hrehlo tur leh thurawn te pe fo thin turin mipuite chu a sawm a ni.

Minister hi Pu J. Hmingthanmawia, Director Commerce & Industries, Dr F. Lallianhlira, Principal Director H&FW, Pu R. Lalrintluanga, CE (Road) PWD, Dr H. Lalchungnunga, Director, DHS, Dr T.Lalhmangaihi, Director, DHME leh Pu HD Lalrintluanga, Joint Director Commerce & Industries te bakah Lunglei District official te, khawtlang hruaitute leh party hruaituten an tawiawm a. Naktukah Minister leh amah zui tute hian Tuipui D, Darzo, S Vanlaiphai, New Kawngpui, Lungpui Tlang leh Muallianpui khua te an tlawh leh dawn a ni.