Deputy Commissioner/District Election Officer, Aizawl District, Aizawl chuan ni 5.10.2019 khan Sinlung Hills Council Inthlan neih tur chungchangah mipuite hnenah a hnuaia mi ang hian Ngenna (Appeal) a siam a ni :

Sinlung Hills Council inthlanpui hmasa ber chu kan lo hmachhawn dawn ta reng mai a. He inthlan lo awm tur atan hian inbuatsaihna ngawrh takin a kal mek a.

India khua leh tui zawng zawngten India Ram Danpui (Constitution) hnuaiah dikna leh chanvo kan nei vek a. heng dikna leh chanvo (Rights) te hi sorkar leh a kut leh ke hrang hrang hmangin humhalh sak kan ni. Heng zinga pawimawh ber pakhat chu Universal Adult Franchise (India khua leh tui dik tak, kum tling tawhte tana inthlannaa vote an thlak theihna) chanvo hi a ni. Hemi humhalh tur leh chanvo neituten an chanvo an chan ngei theih hi State Election Commission, Mizoram duhdan leh tum ber a ni.

Chumi bawhzuina atan chuan Aizawl District Election Officer (District Commissioner ni bawk) chuan Sinlung Hills Council huamchhunga Universal Adult Franchise chanvo nei zawng zawngte tan (vohbikte leh pianphunga harsatna nei zawng zawngte pawh huamin) Aizawl leh Saitual District chhunga Sinlung Hills Council Area ah inthlan November ni 5, 2019 khian a buatsaih dawn a. Hemi area chhunga khawsa India khua leh tui, Tribal, kum 18 tling tawh zawng zawngte Sinlung Hills Council Electoral Roll-a inziak lut turin a hriattir tawh a ni. Sinlung Hills Council Electoral Roll-a inziak lut tawh i nih chuan India ram Danpui hnuaia i dikna leh chanvo i chan ngei theihna turin November ni 5, 2019-ah Electroal Roll-a i inziahluhna hmunah i VOTE hlu tak thlak ngei turin ngen i ni e.

Vote thlak chungchangah PwD Voter ten harsatna an tawh thin sutkian a nih theih nan Polling Station-ah hengte hi chhawpchhuah tum a ni bawk e : 1). Ramps (kailawn), 2). Wheelchair leh 3). Booth Level Duty

RAM KALSIAM TURIN RAWN PENCHHUAK VE RAWH LE!