Ni thum chama Mizoram rawn zin, sipai hotulu – GOC 3 Corps Lt. Gen. A. K. Sahni chuan vawiin khan Mizorama Assam Rifles te hmunpui Khatla-ah sipai bang (Ex-servicemen) te a kawm a. He inkawm hona ah hian Col. Z. S. Zuala, MLA; Wing Cdr. (Rtd) Lalzawma; Col. John Zama; Sainik Welfare & Resettlement Director Surg. L. Cdr. (Rtd) Lalnuntluanga leh Ex-servicemen mi 50 vel an tel bawk.

Lt. Gen. A. K. Sahni hi IGAR(East) Maj. Gen. Satish Dua; Commander 23 Sector Assam Rifles Brig. GVK Reddy leh officer dangten an tawiawm a ni. Lt. Gen. Sahni chuan ex-servicemen te hi sipai bang ni mahse Army leh Ram chuan ram tana an inpekna chu engtikah mah a theihnghilh dawn lo a ni,a ti a, anmahni chhawmdawl leh harsatna an tawh thin te sutkian sak chu a ngaipawimawh em em a ni, a ti bawk. Manipur dinhmun a ziaawm hunah Mizoram ah army battallion khat dah tum a nih thu a sawi lang bawk.

Ex-servicemen te hian Lt. Gen. Sahni hnenah Ex-Servicemen Contributory Health Scheme hnuaia Ha leh Mit inentirna lamah harsatna an tawh chungchang te, ration lak chungchanga harsatna an tawh te, sipai lak runpuia written exam chawlhni a neih thin in harsatna a siam thin avanga, exam ni sawn an duh thu te leh Smart Card an dawn tlai avanga CSD lamah harsatna an tawh thin te chu an thlen a. Lt. Gen. Sahni hian heng harsatna an tawh te hian a tul leh a theih anga a bawhzui a tum thu ex-servicemen te chu a hrilh nghal a ni.

Lt. Gen. Sahni hian vawiin vek khan Guwahati a pan nghal a ni.