976/2022-2023
Aizawl, the 21st June 2022 : Sawrkar Laipui chuan tunhnaia khan sipai lak dan scheme thar Agnipath Scheme a ruahman a, he ruahmanna thar kaltlanga sipai lak te chu Agniveer tih an ni dawn a. Tun atanga Sipai lak reng reng(khawmual, thlawhna leh lawng sipai) chu hemi Scheme zulzuia lak a tawh dawn a, he Scheme hi kumin atanga hman tan nghal tura ruahman a ni. Agniveer te hi kum 4 chhung atan lak an ni dawn a, an lak zat atanga za zelah 25 chu dahngheh tur a ni dawn, a bak zawng chu an term kum 4 a tawp hunah sumfai nen an chhuak ang.

Agnipath Scheme hian service pathum – Army, Navy leh Airforce ten sipai an lak thin chu in angin a huam vek dawn a. Agniveer diltu kum bithliah chu kum 17 leh a chanve leh kum 23 inkar a ni a. Dilna hi centralized online system a kalpui tur a ni dawn bakah technical zirna in, ITI ang te leh National Skills Qualifications Framework kalpuina institute ah te a bika specialized rally leh campus interview te katlang pawhin lak an ni dawn a ni. Agniveer hi All India All Class angin lak an ni dawn a, a awmzia chu tunhmaa a regiment zawnga hnam thenkhatte lak thin chu a tawp dawna, ang khat vekin lak an ni tawh dawn a ni.

Agniveer te hian thlatin hlawhbi bakah an service luhna in a huam tel Risk and Hardship Allowance te an la anga. A kum khatnaa thlatin cheng 30,000; a kum hnihna naa thlatin cheng 33,000; a kum hnihna naa thlatin cheng 36,500 leh a kum li naa thlatin cheng 40,000 an hlawh dawn a ni. An hlawh atangin a kumkhat naa thal tin cheng 9000; a kum hnih naah thla tin cheng 9900; a kum thum naah thla tin cheng 10,950 leh a kum li naah thla tin cheng 12,000 Corpus Fund ah dahsak an ni ang, Sawrkar in thatin an dah zat ang Corpus Fund ah a do let ve ang a. He Corpus Fund tlingkhawm a pung nena chhut ‘Seva Nidhi Package’ cheng nuai 11.74 hu tlingkhawm chu an chhuah hunah pek an ni ang. Kum 4 an thawh chhungin Life Insurance cheng nuai 48 man, anmahni chawi ngai lovin Sawrkarin a lak sak dawn bawk a ni.