977/2022-2023
Champhai, the 21st June, 2022: Ruihhlo leh a kaihhnawih hrang hrang laka India ram a fihlim theihna tura sawrkar laipuia Ministry of Social Justice & Empowerment leh Mizoram State Social Defence & Rehabilitation Board-te tangkawp hnuaia National Action Plan for Drug Demand Reduction (NAPDDR) hmalakna, 'Nasha Mukh Bharat- Drug Free India Campaign' kalpuitu District Level Nasha Mukt Bharat Abhiyaan Committee, Undivided Champhai District chu vawiin chawhma khan Champhai District Bawrhsap Pu James Lalrinchhana, Chairman, District Level Nasha Mukt Bharat Abhiyaan hovin DC Conference Hall-ah an thukhawm.

Pu James Lalrinchhana chuan ruihhlo leh a kaihhnawih laka fihlim thei turin theihtawp chhuaha tanlak a tul thu sawiin, Champhai District-a ruihhlo hluar zel tur doa beihlet nan tha thlah lova tanrual a tul a ni, a ti a. Ruihhlo do kawnga hmalakna dang District Level Narco Coordination Centre (NCORD) Committee nena kalkawp thiam a pawimawh thu pawh sawiin, tum leh beih thuhmun a nih anga tantlan thiam a ngaih takzet thu a sawi a. District chhanhim leh hmasawn zelna kawnga committee pawimawh tak a nih angin thahnemngai taka thawhho zel a tul thu a sawi bawk.

He hunah hian hmalak tawhna leh sum hman dante bakah, hemi hnuaia hmalak dan tur kimchang leh fund hman dan turte ngaihtuahho a pawm a ni a. Drug Awareness Campaign neih dan tur kimchang leh Campaign Team-te siam turin Coordinator chu ruat niin, zirna in Middle School atanga tana ruihhlo ti lo tura inzirtirna kalpui nise tih a ni a, heng bakah hian kum tlinglo School kal tawhlote, raltlan camp leh District Jail-ahte inzirtirna neih nise tih a ni bawk a. June ni 27, 2022 a International Day Against Drug Abuse & Illicit Trafficking hman dan tur chungchang rel niin, Bawrhsap hova Govt. Champhai College-a hun hman zawh hnuah a hmasa atan khawpui chhunga zirnain thlanchhuah 11 ahte drug awareness campaign neih tha tih a ni a, resource person turte pawh ruat nghal an ni. Nasha Sub-committee/team 6; Committee for fine policy at government office, Drug treatment facility monitoring team, Sale of tobacco/cigarette monitoring team, Drug control sub-committee, Sale of drug monitoring team leh Public participation sub-committee-te siam fel niin, District Level Nasha Mukh Bharat Abhiyaan Committee thutkhawm neih apiangin hmalaknate tarlan thin nise tih a ni bawk.

Member Secretary, Nasha Mukt Bharat Abhiyaan, Champhai District Pi PB Liansangpuii, Coordinator, Mizoram Social Defence & Rehabilitation Board, Social Welfare & Tribal Affairs Department hnen atangin Nasha Mukh Bharat Abhiyaan kaltlanga ruihhlo do kawnga hmalakna hrang hrangte leh meeting neih tura chhawpchhuah agenda sawizauna ngaihthlak a ni a. Nasha Mukh Bharat Campaign hnuaiah midangte zirtirna pe turin Peer volunteer 50 ruat an ni a, training-te pek an nih hnuah ruihhlo laka fihlim tura inzirtirna an pe thin a, Govt. Champhai College-ah Youth Club din a ni bawk. Zirna in 5, Kohhran leh khawtlang 3 bakah District Level Football Tournament-ahte inzirtirna buatsaih a ni a, HIV blood test leh social media campaign-te neih a ni bawk a. Sawrkar laipui atanga endikna tum 1 neih a ni tawh bawk.

Hemi campaign hnuaiah hian peer volunteer leh campaign hrang hrang kaltlangin mi 5,954 te hnenah ruihhlo laka fihlim tura inzirtirna September 2020 atanga March 2022 chhungin neih a ni a, heng zinga mi 3,450 te hi thalai an ni a, mi 2,340 te hi nu valai lam niin, a dang 164 te chu khawtlang hruaitute an ni. Hripui leng karah pawh a remchan dan angin online councelling neih thin a ni a. Ruihhlo ngheia bansan phah mi 2 an awm tawh thu meeting-ah hian tarlan a ni bawk.

Masha Mukh Bharat Abhiyaan-Drug Free India Campaign hnuaiah hian India rama District 272 ahte ruihhlo do hmalakna kalpui a ni a. Aizawl, Kolasib leh Champhai District-te chu Mizoram atanga he campaign kalpuina tura thlante an ni a, Narcotics Control Bureau (NCB) leh Ministry of Social Justice & Empowerment kaltlanga National Survey neihin drug hluarna District nia a tarlan zulzuia thlante an ni.