Mizoram thalai te tan Rajiv Gandhi Stadium, Mualpui-ah Indian Army tan Sipai Lak Runpui (Recruitment Rally) April ni 15 – 20 inkarah buatsaih a ni dawn. Rally ah hian Soldier (General Duty); Soldier (Tradesman) Soldier (Technical) leh Soldier (Clerk) te lak a ni dawn.

Soldier (General Duty) leh Soldier (Tradesman) tan Aizawl, Kolasib, Mamit leh Champhai District a chengte chu April ni 15 ah intlar tur a ni a, hetiang bawkin Serchhip, Lunglei, Lawngtlai leh Saiha Districts a chengte chu April ni 16 ah intlar tur a ni. Sipai tanglai fate, sipai pension tawh fate, sipai pasal sun tawh hmeithai fate, NCC ‘C’ Certificate nei te leh infiam mite chu April ni 16 ah vek intlar tur a ni. (hei hian District zawng zawng a huam ang).

Soldier (Tehnical) leh Soldier (Clerk) tan April ni 17 ah intlar tur a ni anga, hemi hna pahnih bikah hian Mizoram bakah Hmarchhak state dang atanga lokal te pawh an intlar thei a ni.

April ni 18 - 20 inkarah hian he Rally a tling te chu an Document leh an hriselna (Medical) endik a ni ang.

e sipai lak runpui atan hian a hmaa dilna thehluh hran a ngai lova, a ni a intlar mai tur a ni. Soldier(General Duty) leh Soldier(Tradesman) tan hian Pawl 8 pass chin an intlar thei a, hemi atana kum bithliah chu kum 17 leh a chanve leh kum 21 inkar a ni. Soldier (Technical) leh Soldier (Clerk) te hi Pawl 12 chin tan intlar thei niin kum bithlaih chu 17 leh a chanve – 23 inkar a ni a, amaherawhchu 50 percent chunglam an hmuh a ngaih bakah Pawl 10 Mathematics leh English a 40 percent tal an hmuhtlin a ngai ang.

Document pawimawh te chu - Permanent Residence Certificate emaw, Certificate of Nativity emaw Domicile Certificate emaw, Class 8th, 10th class or 12th pass certificate, character certificate (thla ruk aia hlui lo), unmarried certificate, consent certificate (kum 18 aia naupang tan) leh ST certificate te a ni a. Document original leh Xerox set hnih ken tel tur a. Passport size thlalak copy 12 (thla ruk aia hlui lo) ken tel a ngai bawk. Thlalak hi light background a lak chu duhthusam a ni. Hrechiang duh tan Army Recruiting Office, Supply Point Zembawk ah zawhfiah theih a ni a. He Office phone no. te chu 0389-2351166 leh 0389-2351518 te a ni. Aw record sa –Integrated Voice Response System hmangin phone no. 0389-2350141 ah a zawhfiah thei bawk a ni.

Intlar ni ah hian thuamhnaw inthlakna ken tel a that thu leh tunlai khaw awmdan en in document te cu sarang emaw file cover emaw (huh thei lova) dah turin ARO te hian intlar tumte chu an chah a. Hriselna endik hunah hian beng a fai tawk loh thin avangin leh taksa a tattoo an neih avangin mi tam tak an tla thin a, chuvangin beng ti fai turin leh tattoo tihreh chu ngaipawimawh turin an chah tel bawk a ni. Sipaia tlin hi mahni theina, merit based behchan anih avangin mibum hmang te laka fimkhur turin leh sum tham a sipai a luh tir theia insawi an awm chuan chung mite chu thuneitute leh ARO te hnenah pawh hriattir(report) turin an ngen bawk a ni.