Vawiin khan January ni 15 – 17, 2013 inkarah Rajiv Gandhi Stadium, Mualpui a Sipai Lak Runpui neih tur chu Aizawl DC Dr. Franklin Laltinkhuma hovin a pisa-ah Army Recruiting Office Director, Col. D Phandsalkar leh hemi chungchanga mawhphurna nei Department hrang hrang ten an thlir ho a, hemi atana thil pawimawh – Recruitment Rally puanzarna, eng, tui, police duty, traffic control, document chungchang te an sawi ho a ni.
Meeting-ah hian Department hrang hrang leh Mizoram Sawrkar chuan hlawhtling taka Sipai Lak Runpui a awm theih nan theitawp chhuah a an pui thin chu Col. Phandsalkar chuan lawmawm tiin lawmthu a sawi a, nakum Recruitment Rally ah pawh theitawp a pui turin a ngen nghal bawk a ni.
Rally ah hian Soldier (General Duty); Soldier (Technical); Soldier (Nursing Assistant) leh Soldier (Clerk/Storekeeper) te lak a ni dawn.
January ni 15, 2013 khian Soldier (General Duty) atan Mizoram District zawng zawng a mite chu an intlar thei ang a. Soldier (Technical); Soldier (Nursing Assistant) leh Soldier (Clerk/Storekeeper) tang duhte chu January ni 16 leh 17 ah an in tlar thei ang. Soldier (Technical); Soldier (Nursing Assistant) leh Soldier (Clerk/Storekeeper) te tan hian Mizoram thalai bakah Arunachal Pradesh, Assam, Meghalaya, Tripura leh Nagaland a mite pawh an intlar thei ang. Sipai tanglai fate, sipai pension tawh fate, sipai pasal sun tawh hmeithai fate, NCC ‘C’ Certificate nei te leh infiam mite chu Soldier (General Duty) atan chuan January ni 15 vekah hian intlar tur a ni ang.
January ni 18 - 20 inkarah Rally-a tling te Document leh hriselna (Medical) endik a ni ang. Hetah tling Soldier (General Duty) leh Soldier (Technical) te chuan February ni 2 khian Kendriya Vidyalaya, Aizawl ah Written Exam an nei ang.
He sipai lak runpui atan hian a hma ah dilna thehluh hran a ngai lova, a ni ah intlar mai tur a ni ang. Soldier(General Duty) chu Pawl 8 pass chin tan dil theih niin kum bithliah chu 17½- 21 inkar a ni ang. Soldier (Technical) leh Soldier (Nursing Assistant) te tan chuan 10+2 (Science) leh Soldier (Clerk/Storekeeper) tan chuan 10+2 chin tan dil theih niin kum bithlaih chu 17½ – 23 inkar a ni ang.
Hrechiang duh tan Army Recruiting Office, Supply Point Zembawk ah zawhfiah theih a ni. He Office Phone No. te chu 0389-2351166 leh 0389-2351518 te an ni. Integrated Voice Response System hmangin Phone No. 0389-2350141 ah a zawhfiah thei bawk a ni.
