Nikum October thla-a Masimpur-a Sipai Lak Runpui kaltlanga Mizoram District hrang hrang atanga thalai 62 tling te chuan hmun hrang hranga Sipai Traning Centre-ah training tan turin March ni 23(Inrinni) khan Aizawl an chhuahsan. Army Recruiting Office (ARO), Aizawl chuan an chhuah hma lawkin an hmunpui Zembawk-ah heng thalai leh an nu leh paten pualin inkhawm tawite an buatsaih bawk a ni.

He inkhawm-ah hian Col. D. S. Phandsalkar, Director, ARO, Aizawl chuan thalai te chu an mahni theihna leh an tumruhna avangte tling a ni tih hre reng chunga, tuarchel taka training paltanga, an nu leh pate chawimawi a, Mizoram leh Ram hming titha turin a fuih a. An training-na hmunah te state hrang hrang thalai te thian tha a siam a, English leh Hindi thiam ngei tuma zir turin a chah bawk a. Nu leh pate thlazarna hnuaia an awm tawh dawn loh vangin mahni inthunun a pawimawh dawn a, mi dangte atangin chin dan tha chiah zir a, chin dan tha lo leh thil tha lo lakah fihlim turin a chah bawk a ni.

May ni 7 – 9 inkarah Sipai Lak Runpui neih a nih tur thu sawiin, Col. Phansalkar chuan hei hi a zau thei ang berah thalai leh midang hrilh chawng turin kalkhawmte chu a chah bawk a ni.