Hmarchhak State hrang hrang te silai inkahsiak hmasa ber, Zaua Sailo Memorial 1^st North East Shooting Championship chu nimin khan Mizoram Chief Minister Pu Lal Thanhawla'n Youth Hostel, Luangmual-a inkhawm buatsaihah a khar.

Chief Minister Pu Lal Thanhawla chuan hmarchhak State hrang hrang thalaite zingah infiamna lama talent nei tha tak tak an inphum a, chu chu hriain Indian Olympic Association pawhin North East infiammi te talent haichhuak tura tan lak a phur hle a ni, a ti a. Mizoram pawh rambuaiin kum rei tak chhung hmasawnna tithuanawpin infiamna lama thalaite mamawh phuhru thei lo mahse tunah erawh Sports Minister leh a thawhpuite thahnemngaihna avangin khelmual pathumah astorturf phah a nih tawh thu te, Sports Academy, Stadium leh khelmualte Mizoram khaw hrang hrangah siam a nih thu te bakah infiamna lama thalaite mamawh thil tam tak lakluh leh siam a lo ni ta chu lawmawm a tih thu a sawi a ni. Pu Lal Thanhawla chuan silai inkahsiak chu Arms Act in a phuar avanga sports discipline hrang hrang zingah hmanrua neih harsa ber ni mahse he Championship-a hmarchhak infiammi lo tel te thiamzia enin nakin lawkah rampawna India ram tihmingthatu silaikahthiam tak tak an rawn chhuah a beiseiawm hle a ni, a ti a. Shooting Championship hlawhtling tak an buatsaih avanga Mizoram Rifle Association-te chu fakawm a tih thu sawiin infiammite chu an hma lam hun zelah duhsakna a hlan bawk a ni.

Chief Minister Pu Lal Thanhawla fapa neihchhun Lal Thanzaua Sailo (Zaua Sailo) hriatrengna atana buatsaih hmarchhak huap silai inkahsiak hmasa berah hian Assam, Meghalaya, Mizoram leh Nagaland atangin silai kahthiam 182 an tel a. Category hrang hrang 22-ah an inel a. A pumpuiah Mizoram chu pakhatna niin Gold 9, Silver 8, Bronze 10 an la a; pahnihna Manipur chuan Gold 8, Silver 6, Bronze 3 an la a; pathumna Assam chuan Gold 5, Silver 4, Bronze 4 an la a; palina Meghalaya chuan Silver 1 an la a ni.

He hun hmang tura lo tel National Rifle Association of India President Pu Raninder Singh pawhin hmarchhak silaikahthiam te chet dan thlirin Indian National Team-a tel pha tura beiseiawm tak tak a hmuh thu te, Zonal Shooting Competition- North, South, Central leh East Zone-a kum tin neih thin pawh hmarchhak state silaikahthiam te tan kawng zau zawk a inhawn theih nan North East Zone telh ve tum a nih thu te a sawi a. Silaikahthiam te tana thahnem a ngaihnaah Chief Minister Pu Lal Thanhawla chu fakin sorkarin infiammi te hmasawnna tura theihtawp chhuaha tan a la chu fakawm a tih thu NRAI President hian a sawi a ni.

Tarlan tawh angin Zaua Memorial Ist NE Shooting Championship hi March ni 19 khan Sports Minister Pu Zodintluanga'n a hawng a. Kulikawn Indoor Stadium-a MRA Indoor Shooting Range leh Mualpuia Rajiv Gandhi Stadium-ah te neih niin 10mtrs Air Rifle, 10 mtrs Air Pistol, 25mtrs Sports Pistol, 50mtrs Free Pistol, 50mtrs Rifle Prone (Peep sight) leh 50mtrs Rifle Prone (Open sight)-ah te inelna neih a ni.