Sihphir Branch YMA chuan 22nd - 24th March, 2013 chhung hian Platinum Jubilee an lawm a; vawiin chawhma dar 11.00 -a community hall-a inkhawm buatsaih chu Parliamentary Secretary Pu Lal Thanzara chuan khuallian niin a hmanpui a; Pu R. Lalrinawma, bialtu MLA leh Mizoram Law Commisision chairman chu khualzahawm a ni.

Pu Lal Thanzara chuan Sihphir khua chu Mizoram-a khaw taima leh intodelh ber zinga mi an nih avanga entawntlak a tih thu sawiin, “Sihphir khaw mipuite leh thalaiten mahni kutkawih ngeia dingchhuak tura in thawhrimna hi a fakawm a; YMA member thawh hreh ngah lutuk leh thawh tur hre lo nih hi a inhmeh lo a, kan inenfiah a tul a ni” a ti. YMA chu sawrkar tana kut-ke pawimawh ber a nih bakah, ram leh hnam humhalh tur pawha pawl thawhhlawk ber a ni chu lawmawm a tih thu Pu Lal Thanzara chuan sawiin, “Kan ram leh hnam hi ruihhlo lakah te, kut tling lova hausak thut duhna lakah te humhalh a ngai a. Kan hnam leh sakhua a him a, hnam anga kan dinchhuah theihna turin YMA tluka inzirtirna platform tha dang a awm lova; kan moral siamtha tura pawl tangkai ber in ni”, a ti a. Mizoram chu chibing politics lakah humhalh tul a tih thu leh YMA puanzar hnuaia insuihkhawm chu kan hnam hmakhua atan a him ber a ni, a ti bawk.

Sihphir Branch YMA hian Platinum Jubilee lawman atan nimin khan member 77-in Synod Hospital, Durtlangah thisen an pe a; vawiin khan an khuaa kawng hrang hranga mi entawntlak 12 te chawimawina hun an hmang bawk a; tlaiah ruai an kilho nghal bawk.