Khaw 23 intelkhawmna Zawlbuk Group YMA te chuan March ni 21-23, 2013 chhung khan Thingsulthliah-ah Conference vawi 39-na an hmang a; nizana palai thlahna inkhawmah Home Minister leh Bialtu MLA ni bawk Pu R.Lalzirliana chuan Khuallian chan changin inkhawmpui hi a hmanpui a ni.

Conference kharna inkhawm Zawlbuk Group YMA Secretary Pu C.Lalremkima kaihhruaiah hian Home Minister chuan Mizo thalaite sual leh nun ning anga sawi fo thin hi thalai zawng zawng zinga 1% vel chauh an ni mai thei a, a tam zawk chu Zonun zemawi tak tak - taimakna, tlawmngaihna, huaisenna leh dikna vawng an ni zawk a ni, a ti. Pathian thu pawhin mihringte chu vanglai hun chen a phal a, amaherawhchu hemi vanga nun inthlahdah emaw thatchhiat a phal lo tih hre reng turin thalaite a chah a ni. YMA ten kum 6 chhungin ‘Ram leh Hnam Humhalh’ thupuia an hman chu a fakawm a tih thu sawiin Pu R. Lalzirliana chuan hnamdang huat inzirtir te, chibing zawnga kal te leh tawngkam ringawta intih Mizo erawh a huam tel lo a ni, a ti a. Mizoram chu a chhunga cheng hnam tin chitin tan ralmuanna leh inthliarna tel lova nun hlim tak kan neih theih theuh nan kan thinlung leh chetziaah Mizoram chu ram nuamah siam i tum theuh ang, a ti. Mizoram leilung hausakna leh a chengte talent hailan tak tak a nih theih nan thalaite an inbuatsaih chhoh zel a pawimawh a ni, a ti. Khuallian hian Zawlbuk Group YMA hnuaia YMA Branch zawng zawng leh Thingsulthliah Jt. YMA hnenah tarpauline a sem a. Bialtu MLA a nihna anga a hmalaknain he bial chhungah hian kum khat chhungin Community Hall 9 lai sak zawh a ni a, Group YMA inkhawmpui pawh hi Tlangnuam Community Hall tharah hman a ni nghe nghe a ni.

Palai thlahna inkhawmah hian kangmei laka inven dan chungchang te, Child Line chungchang te leh Horticulture chungchang te awareness campaign neih a ni bawk a. Central YMA aiawhin Pu Lalhmangaiha, CEC Member-in ‘Ram leh Hnam Humhalh’ thupui hmangin thu a sawi bawk. Conference chhung hian he bial atanga mi hlawhtling tak takte chawimawina hun Group YMA hian a hmang bawk a ni.