Vawiin khan Chief Minister Pu Lal Thanhawla chuan  Thenzawl-a ZOHANDCO Office kawt tualah ZOHANDCO hnuaia Thenzawl Handloom Cluster Project-a puantah training chhuak mi 45 te hnenah puantah khawl leh a hmanrua te leh margin money cheng sangruk theuh a sem.

Chief Minister chuan engmah tithei lova awm tawh ZOHANDCO thiltitheia chawhnun leh tawh hian heng khawl leh margin money te hi a dawngtute hnenah pek a ba miah lo a ni tih hre hmasa turin a dawngtute chu a hrilh a. Dawng tlak lo tam tak an awm tih sawiin, tuna a dawngtute hi a khawl dahna nei tha, hralh leh mai lo tur mi thlanchhuah an ni a ti a. Chuvangin a dawngtute chu duhsak tlaka awma, lawmna chang hre turin a chah a. Training tura thlan an ni ringawt pawh hi a lawmawm a, a thlawna dawn phei chu lawm hle tur an ni tiin lawmna chang hriat hi Pathian duhzawng a ni, a ti.

Chief Minister chuan sawrkarin mirethei leh chanhaite chawikan nana a thlawna NLUP a sem, a dawngtu thenkhatin an hmang dik lo chu a vanduaithlakin rulh leh hial an ngai dawn a ni, a ti a. Chuvangin, sawrkarin eizawn nana a thlawna tanpuina a pek te hi rinawmna, dikna, taimakna leh Pathian tihna nena kalpui tur a ni, a ti. ZOHANDCO tanpuina an dawnte atang hian quality tha tak siamchhuak a, a leitute inchuh tham leh khawvel hriat hlawh tura rahchhuak turin a ngen a ni.

Thenzawl Handloom Cluster Project-a Loom, Accessories leh Margin Money semte hi Ministry of Textiles hnuaia Integrated Handloom Development Scheme atanga sanction a ni a, a vai hian 55.50 lakhs niin Mizoram State Share chu 3.585 lakhs a ni. Mimal tin hnena sem, puantah khawl leh hmanraw dang leh margin money zawng zawng hu chu Rs. 23,979 a ni a. Mi 45 hnena sem zawng zawng hlut zawng hi Rs. 10,79,055 a ni.

ZOHANDCO hian puantah tute hamthatna tur, Common Facility Centre, Thenzawl-ah din turin hma a la mek a, kum 2009 atangin Central Sawrkar atanga Fund a hmuh zawng zawng chu Rs. 1260.66 lakhs a ni.

Thilthlawnpek semna inkhawm hi ZOHANDCO Chairman Pu Albert Lalthlamuana'n a kaihruai a ni.