2315/2024-2025

Dated Aizawl, the 1st October, 2024: National Dairy Development Board (NDDB), Anand, Gujarat; AH & Vety. Department, Govt. of Mizoram; Mizoram State Rural Livelihoods Missions (MZSRLM) leh SIRD&PR, Mizoram tangkawpte buatsaih Accredited Agent for Health and Extension of Livestock Production (A-Help) Batch 6 leh 7 te tana training buatsaih, ni 17 (1-17 October, 2024) chhung awh tur chu vawiin chawhma khan SIRD&PR Conference Hall, Durtlang Leitan-ah hawn a ni a, he hun hi Pi Zosangzuali Pachuau, Chief Executive Officer (CEO), Mizoram State Rural Livelihoods Mission (MzSRLM) chuan a hmanpui a ni.

Training hawnna inkhawm A-Help State Nodal Officer, A.H & Vety Department Dr. T.C. Lalthanzauva kaihhruaiah Pi Zosangzuali Pachuau chuan buai tak kara chhungkaw nu ber mi engemawzatte'n training an tel thei chu lawmawm a tih thu sawiin, A-Help training chhuak tawhte'n an khua theuhah tangkai taka hna an thawk thin chu lawmawm a tih thu a sawi a. CEO, MzSRLM chuan Self Help Group member-te chu an mahni khua theuhah midangte tana malsawmna ni zel turin a chah a; tuna training an zawh hunah pawh mahni veng/khua theuhah mi tangkai leh chhawrnahawm tak ni thei tura taima leh uluk taka zirtirnate ngaithlaa zir turin a chah a. AH& Vety Department nena thawhhona tha tak an nei chu lawmawm a tih thu sawiin, A-Help ni tura inzirte chu thahnemngai taka training neia hlawkpui ngei tum tur leh, chhawrtlak ngeia thiamna nei turin a fuih a ni. 

Thusawitu dang Dr. Vanlalhruaia, Jt. Director, LD&B, AH & Vety. Department chuan ran atanga thil siam quality tha thawn chhuak turin ran hrisel tha neih hmasak a pawimawh thu sawiin, hemi tur hian thingtlang kilkhawr ber thlenga hmalak angaih avangin Accredited Agent for Health and Extension of Livestock Production ruahmanna hi a lo chhuak ta a ni, a ti bawk. 

Training hawnnaah hian Dr. Lalhruaitluangi Sailo, Sr. Core Faculty, SIRD&PR, Training Manager ni bawk chuan training chhunga hriattur tlangpuite a sawi a. Pu Vanlalhmangaiha, Project Manager, Farm Livelihoods, MzSRLM, Training Manager ni bawk chuan lawmthu sawiin hawnna hun hman hi a khar a. Training a kalte hi ran enkawlna atana an hman tangkai tur A-Help Kit pek vek an ni.

A-Help training-ah hian Phullen, Reiek, W. Phaileng, Thingdawl, Khawbung, Aibawk leh Tlangnuam RD Block-te atanga MzSRLM hnuaia Livestock Community Resource Persons thlan bik mi 50 te chu batch hnihah thenin Master Trainers leh External Facilitator-te'n zirtirna hi an pe thin dawn a ni.