2314/2024-2025

Saitual, the 1st October 2024: Vawiin hian Mizoram State Project Monitoring Committee chuan Er. Lalthanzuala Ralte, Secretary, MSPMC hoin Saitual - Saichal kawnga Vaibek rama Pu Lungmuana stone quarry an enfiah a, heihi tunhnaia social media-ah lung tha lo kawng siamna atana hman mai tur anga lak nia sawi a awm vang a ni.

Er. Lalthanzuala Ralte chuan, he quarry-a lung hi a chang lo a, a pianpuizia anga rei tak a awm theih loh avangin kawngpui siam nan a hman tlak lo a. Hetiang hi Indian Standard Code of practice ang chuan hman phal a ni lo, a ti. Er. H. Laldintluanga, Asst. Prof. Civil Engg. Dept, MZU, MSPMC member pawhin, he quarry-a lung chu ‘Shale rock’ a ni a, pan tetea a til thin avangin tuiin rei lote a chiahin an pianpuizia (properties) awlsam tein a inthlak thin a. Kawng siamna atan a hman tlak loh a, fur a lo nihin chirhah a chang mai thin, a ti. Er. Laltlanthangi Ralte Sr. EE, PWD, QCR&D Division leh Quality Control team ten quarry lung sample an la a, zirchian turin MPWD Central Laboratory, Zuangtuiah an test dawn a ni. Quarry neitu leh enkawltu Pi Hmingsawithangi chuan lung hi August 2024 thla atangin NHIDCL-in an la tih a sawi a, lung hi hmun dangah an pek ngai loh thu a sawi bawk.  

He hunah hian Er. Lalthanzuala Ralte, Secy, MSPMC, Er. Laltlanthangi Ralte, Sr. EE, PWD, QCR&D Division, Er. Laldintluanga, MSPMC member, Pi Vanchhungi, Task Force, MSPMC Member, Pu Vannunmawia, PS to Vice Chairman, MSPMC, Pu PC. Liansailova, JE, PWD leh Pi F. Zodingpuii, DIPRO, Saitual te an kal a ni.