Vawiin khan State Institute of Rural Development & Panchayati Raj (SIRD&PR) Conference Hall, Durtlangah Sawrkar laipuia Ministry of Social Justice & Empowerment leh State Institute of Rural Development (SIRD) tangkawp buatsaihin ‘One Day Capacity Building Workshop on Drug Abuse Prevention for Panchayati Raj Functionaries’ neih a ni a. SIRD&PR Director Pi Maria C.T.Zuali chuan training hi a hawng a ni.

SIRD&PR Director Pi Maria C.T.Zuali chuan thu sawiin mizote hi ruihhlo, zuk leh hmuam hian min chiah hneh hle a, kan do let a, ti lo tura kan inzirtir nasat a ngai a, chumi atana pawimawh pakhat chu khawtlang hruaitute an ni, a ti a.  VC member-te hnenah chuan kan huamchhung theuhah hma kan lak a pawimawh a ni, a ti a. Kan hrisel a, finna leh thiamna lama hma kan sawn theih nan ruihhlo kan do a ngai a, nuin naupai lai atang tawhin ruihhlo kan tih loh a ngai a ni, a ti a. Training pawimawh tak neih a ni chu lawmawm a tih thu a sawi a ni.

Training hawnna hi State Panchayat Resource Centre (SPRC) Faculty (Planning) Course Director Pu K. David Lalthanmawia chuan a kaihruai a. Tlangnuam RD Block huamchhunga VC member 28 an tel a. Excise & Narcotics Asst. Commissioner Pu Z. Lalhmangaiha chuan kalkhawmte zirtirna a pe a ni.