International Labour Organisation(ILO) leh Mizoram sorkar Labour & Employment & Industrial Training(LE&IT) department te buatsaih, Start and Improve Your own Business Training chu ni 10 chhung kalpui a nih hnuin vawiin khan khar a ni ta a. ITI complex ah kharna hun hman niin Pu P.L. Thanga, Member Secretary, Mizoram State Planning Board in a hmanpui a ni.
SIYB training hi khawvel ram hrang hrang 110 ah kalpui niin Mizoram hi India hmarchhak biala hetiang training kalpuina hmasa ber a ni a. Vawiina training kharna inkhawmah hian Khuallian Pu P.L.Thanga chuan Mizoram sorkar flagship programme NLUP in UN Agency hrang hrang te nena thawh hona tura UN Joint Initiative project a hrin chhuah dan leh chumi hnuaiah chuan tuna SIYB training of trainers programme pawh hi ILO hmalakna a kalpui a nih dan a sawifiah a. Hei hian a tum ber chu ram chhunga kan tha leh zung, ram leilung hausakna chhawr tangkai lohva luangral te ram hmasawn nan hlawk taka hmang turin hnathawktute hnenah sumdawnna bul tan dan leh tihlen dan zirtir a, anmahni hmanga Zoram thar siam a ni, a ti a. Hnathawktute hnena zirtirna pe a, hma hruaitu atan ITI instructor te chu thlan an ni tiin sorkarin anmahni ah rinna leh beiseina sang tak a nei a ni, a ti . Kharna inkhawm hi Pu V.Lalremthanga, Secretary, LE&IT in a kaihruai a. Pu Ananda P.Menon, Programme Officer, ILO for South Asia and Country Office for India in report pe in tuna IT Instructor te chu Master Trainer ni thei tura tan la turin a fuih a. ILO hnuaia Master Trainer hi mi 200 chauh awmin khawvel hmun hrang hrangah SIYB training 17000 buatsaih a ni tawh a ni.
SIYB Training hi August 17 atanga neih tan niin district hrang hrang atangin instructor 40 an tel a. Vawiin a kharna inkhawmah hian trainees te aiawh leh Master Trainer te hnen atangin he training chungchanga an thil hmuh dan leh hlawkpui dan feedback report ngaihthlak a ni a. Training na a titha te hnenah lawmman leh trainee zawng zawng hnenah certificate hlan a ni a. Pu James Lalrinchhana, Secretary NIB inlawmthu sawiin hun hnung a khar a ni.
