UD&PA (SJSRY Cell) buatsaihin vawiin khan Synod Conference Centre-ah Aizawl khawpuia BPL hmeichhia te tan Sensitization Workshop hman a ni a, SJSRY hnuaia tanpuina sum semna leh training zo te hnenah Certificate hlanna hun hman nghal a ni. UD&PA Minister Pu Zodintluanga leh UD&PA Commissioner & Principal Secretary Pu R.L. Rinawma ten he hun hi an hmanpui.

Khuallian Pu Zodintluanga chuan Urban BPL Women Self-Help Group 21 hnenah tanpuina sum semin mi harsa leh rethei zawk ten lei rem an lo rah theihna turin sorkar chuan kawng hrang hrangin hma a la a, chung zinga a hlawhtlinna pakhat chu vawiinah kan tawng mek a, a lawmawm hle a ni, a ti. UD&PA thawhrimnaah lawmthu sawiin Minister chuan an mi enkawlten hma an sawn lehzual theihna tura tang sauh sauh turin a chah. India rama mihring maktaduai 285.35 cheng zingah maktaduai 61.8 zet te chu BPL an ni a. Khawvelin hma a sawn zel a, mi tin maiin khawpui kan bawh nasa tual tual a, chuvang chuan khawpui miretheite chawikanna pawh hi a hautak tial tial avangin sorkar pawhin khawpuia mirethei khawsa te chu buaipui leh zual a ni, a ti. Mizoram sorkar pawhin mirethei chawikanna lamah theihtawpin hma lain BSUP leh IHSDP hmangin Aizawl leh district headquarters-ah mirethei chenna in tam tak a sa mek a, state pum huap programme lian tak NLUP pawh a kalpui mek a ni, a ti. Khawpuia miretheite tan bika ruahman SJSRY hi kum 2009 atang khan district zawng zawngah kalpui lo ni tawhin vawiina BPL Women Self-Help Group 21 hnenah eizawnna bul tan nan tanpuina sumfai Rs.25,000/- theuh pek tur hi hlawhtlinna ropui tak a ni, a ti bawk. Kuminah BPL member 100 tan Bank hrang hrang 15 te nen tangrualin loan leh subsidy pe chhuak thei turin hmalak mek a nih thu Khuallian hian a sawi a. Mizoram khawpui hrang hranga miretheite inhlawhna siam paha khawtlang hmasawnna leh rotling SJSRY hnuaiah thawh mek hmang hian khawpui hmel pawh nasa takin thlak danglam a ni chho zel a, mipuite pawhin sorkar tanpui leh thlawp zel turin Minister chuan a sawm nghal a ni.

Vawiin khan SJSRY hnuaia trade hrang hrang 14 - tailoring, electronics, carpentry, mobile repairin, hair-cuttin, beauty culture, motor driving, flower making, automobile repairing, handloom, computer application, computer hardware, catering & food processing leh mombati making - a training chhuak mi 695 hnenah Khual zahawm Pu R.L. Rinawma’n Certificate a hlan nghal bawk a ni.

SJSRY hi khawpui miretheite chawikanna tura sorkar laipuiin scheme a duanchhuah a ni a, kum 1997 December ni 1 atang khan India rampumah hman tan a ni. SJSRY hnuaiah hian peng hrang hrang - Urban Self-Employment Programme (USEP), Urban Women Self-Help Programme (UWSP), Skill TRaining for Employment Promotion Amongst Urban Poor (STEP-UP), Urban Wage Employment Programme (UWEP) leh Urban Community Development Network (UCDN) - te an awm a. A thil tum ber chu khawpuia mirethei ten an thawhchhuah phutawk hlawh an lak leh eizawnna an neih theihna tura tanpui, an kutkawih ngeia eizawnna an neih theih nana training pek leh retheihna sutkian nana pawl din leh vantlang kut tih chak te a ni. Central leh State-in he scheme atana sum an intum sem dan chu 90:10 a ni a. SJSRY-ah hian state level-a thuneitu ber chu State Urban Development Agency (SUDA) a ni a, district level-ah chuan District Development Agency (DUDA) a ni thung. Tunah hian Mizorama District khawpui tinah he scheme hi kalpui tawh a ni.

Aizawl khawpui bikah hian SJSRY hnuaia BPL member 10,920 te chu trade hrang hranga training pek an ni tawh a, thla tin mi 1 hnenah stipend Rs.500/-, an zirna centre hnenah Rs.500/- leh infrastructure support tan tum khatah Rs.700/- pek thin a ni. MHIP leh YMA thenkhat te nen Community Kendra 25 lai din a ni tawh bawk a. SJSRY hnuaiah computer zirna ‘Evolutionary Computer Academy’ din a ni a, seat 36 awmin kalpui mek a ni. DOEACC-ah Computer ‘O’Level zirnaah kumtin BPL member te tan seat 15 reserve a ni bawk a. BPL hmeichhiate hmasawnna leh chawikan nan Self-Help Group 60 zet din a ni tawh bakah naupang chanhai leh rualbanlote tan training leh stipend midang ang bawkin ruahman thin a ni.  

Mizoram sorkar hmalakna avang leh an thawhthat avangin sorkar laipuiin Mizoram tan bik SJSRY hmalak zelna turin sum Rs.2.8 crores a pek belh nghe nghe a ni.