India ram khawpuia cheng mihring pung zel te tana khawpui chenna nuam leh felfai zawk dinna tura Sawrkar laipuiin Smart Cities Mission a kalpui chhoh mekah Aizawl chu 2nd Stage ah khawpui 23 thlanchhuah zingah telh ve a ni a, Sawrkar Laipui ruahman angin ni 15 April 2016 ral hmaa ruahmanna thehluh tur a nih avangin chumi chungchang ngaihtuahin vawiin tlai dar 3:00 khan UD&PA Secretary Dr C.Vanlalramsanga hovin Secretariat Conference Hall ah a kaihhnawih department hotute leh tlawmngai pawl leh mithiam sawm bik te an thukhawm.

Meeting Chairman Dr C.Vanlalramsanga chuan Smart Cities Mission project din chhan leh kalpui tum dan te a sawifiah a, Aizawl khawpui Smart City-a siam nana ruahmanna an lo duan chhin te chu thlir hovin hmalakna tura tul leh pawimawh an tih rawtna hrang hrang te an sawiho bawk. Smart City Mission hnuaia hmalakna atan hian khawpui tawt lutuk tihziaawm nana hmalak te, ke-a kal te tana kalkawng him leh nuam zawk siam te, motor parkna tam zawk siam te, Auditorium and Sport Complex sak te, zirna in tihchangtlunna te, mipui hriselna enkawlna tihchangtlunna te, LED street light hman uar te, market siam changtlun te, bus leh taxi service changkang zawka ruahmanna te leh thil dang pawimawh tak tak khawpui mipui te tana tangkai tur te khung tel tum a ni.