Tunlai hian social media kaltlang a Online shopping ti Mizote zing-ah kan tam ve ta hle a. Heng online shopping platforms WhatsApp leh Facebook a Buy and Sale Group hrang hrang te hi misual thenkhat ten mi bumna atan a hmun rengchangah hmang thin in mi bum tur an zawng thin a. Heng te avang hian online shopping ti thin te, online a thil an zawrh lei-ah te fimkhur turin kan in chah a ni. Mi thenkhat ten an thil lei a to zawk a hralh leh beisei in Social Media Buy and Sale Group-ah te an zuar leh thin a. Tin, misusal thenkhat ten an thil ruk leh dan lova an thil neihte awlsam taka tih ral nan an hmang thin bawk. Chuvangin mipui te online a thil man tlawm ngawr ngawr lei a him lo a ni tih kan inhriattir a ni.
Kan fimkhur loh avanga pawisa tam tham tak te kan chan phah theih avangin mipuite kan him zawk nan leh a lo thlawna pawisa kan chan loh nan, Facebook leh WhatsApp kaltlanga thil kan chah/lei dawn reng reng in heng ahnuaia tarlan te hi zawm hram turin kan in ngen a ni.
> Thil man tlawm uchuak tak a zuar an awm chuan inbumna emaw, mi thil ruk leh police case nei te an ni thei. I lei hma in belchiang hmasa la market price nen a inthlauh lutuk chuan zirchiang lovin chah/lei ngawt suh.
> Online a bungrua zuartu chu pawisa emaw bungrua i pek hma in amah hriat chian hmasak tum thin ang che. A contact number bak-ah a personal information/business information hriatchian a chhinchhiah thin tur a ni. A hnu-ah i thil lei avanga buaina (police investigation) i neih palh pawhin amah hriat chhuah a har loh phah in buaina lakah i fihlim phah thei ang. Tin, Fake account/identity lem hmangin bungrua te (thil ruk/dan lova thil neih te) a zuar ru thei a ni tih hre reng ang che.
> A tlawm lutuk a ni tih hre reng chung leh mi thil ruk sa tih hre reng chunga i lei a nih phei chuan IPC Section 411 hmangin a rutu nen ang khat rengin hrem theih i ni tih hria ang che.
> Buy and Sale group hrang hrang-ah mobile phone lei/inthleng (swap) kan uar em em a, he hi rukru te tan chuan an mobile ruk tihralna awlsak tak a ni a. Mobile thar i lei anih chuan sealed pack a ni em tih chian hmasa thin ang che. Secondhand mobile i lei dawn chuan hengte hi a hralh tu i dil tel thin dawn nia.
â– Cash memo
â– Phone Box
â– Original Charger and accessories
Heng a chung amite hi an pe theilo che anih chuan ruk a nih rinhlelh nghal tur a ni a, lei loh a him ber.
