Mara Thyutlia Py (MTP) General Conference chhima Siaha district khawthlang lama hun hmang mek Social Welfare Minister Dr K. Beichhua chuan nimin khan Phura Anganwadi Centre a tlawh. 

Dr Beichhua hi Women & Child Development Director Vanlalpianpuii'n a tawiawm a, hei bakah hian AH & Vety Director Dr Hmarkunga leh Sericulture Department Director Lalrozama te an tel ve bawk. 

Dr Beichhua chuan Anganwadi chu a nihna tur ang taka kalpui a nih chuan naupangte hriselna leh an thanlenna zel atan thil tha a nih thu uar takin worker te leh khawtlang hruaitute a hrilh a, Anganwadi enkawl kawnga VC leh NGO hruaitute mawhphurhnate a hrilhfiah nghal. 

Women & Child Development Director Vanlalpianpui hian Minister Dr Beichhua thurawn angin Siaha district khaw hrang hranga Anganwadi Centre kalpui dan tur zirtirna 

beihpui a thlak nghal a,  Phura Anganwadi Centre bakah nimin vek khan khaw dang, Vahia, Khopai, Siatlai Anganwadi Centre te pawh a tlawh nghal bawk. 

Dr Beichhua chuan Zyhno khuaa pianphunga rualbanlo enkawlna leh zirna hmun, Mary Hechia Residential Special School a tlawh nghal a, an harsatnate leh mamawhte a enpui nghal bawk.