Nimin (30.11.2019) khan Lawngtlai District chhim lam ramri, Zorinpui hmuna India leh Myanmar insumdawn tawnna hmunpui Land Custom Station (LCS) sakna tur hmun chu India leh Myanmar sawrkar ai awh (delegate)-te leh 
Mizoram sawrkar Commerce & Industries Department hotute'n tlawhin, hma lak dan tur an en fiah.

Myanmar atang hian mi 10 lo kalin, India sawrkar ai awh mi 7 leh Mizoram C&I Department hotu mi 4 te nen Assam Rifles hotupa Brigadier Vinod S-a hovin ramria insumdawn tawnna hmun tur hi en fiah a ni a. Zorinpuia LCS hmun atan hian Mizoram sawrkar C&I Department chuan ram bigha 67.32-a zau leiin, a sakna tur cheng vaibelchhe 57.99 (Rs 57.99 crore) hu Detailed Project Report (DPR) pawh theh luh leh pawm a ni tawh a, Schedule of Rate (SOR) 2019 milin Revised DPR theh lut leh tura ruahman a ni bawk.

India leh Myanmar insumdawn tawnna atana Kaladan Multi-Modal Transit Transport Project kawngpui sial hna Mizoram PWD hnuaia thawh mek chu 85% thawh zawh tawh a ni a. Zorinpui leh Myanmar rama Myeik-Wa khaw inkara lei (bridge) dawh kai ngai dawh tura ruahmanna awm mekah lei dawhna hmun tur remchang lai te pawh an en nghal ang.

A hma niin Myanmar delegate-te hian Mizoram Chief Secretary hmuin, Mizoram state kal tlanga India leh Myanmar insumdawn tawnna tur ruahmanna hrang hrang te an sawipui a. Vawiin lam hian Champhai District Zokhawthar lama insumdawn tawnna hmun tur an tlawh leh ang.

Attachment

  • Loading attachment...