Zoram Drivers’ Union (ZDU) huaihawtin vawiin atang khan Mizoram pumah Fimkhurna Hapta, Road Safety Week chu ‘Fimkhur La, Nun Chhanhim Rawh’ tih thupui hmangin hman tan leh a ni a. Lungleiah pawh ZDU Sub Headquarters Lunglei buatsaihin Road Safety Week hawnna hun hi tukin zing khan Lunglei Police Station kawtzawlah neih niin Lunglei HPC Vice Chairman Pu Lawmawma Tochhawng in week hi a hawng.

Hawnna inkhawm Pu Zairemthanga Sailo, ZDU Sub Hqrs President kaihhruaiah Pu Lawmawma Tochhawng chuan Road Safety Week chu mipuite kanlo him zawk theihna tura kum tina lo hman tawh thin a nih thu sawiin, lirthei khalhtu zawng zawngte chu fimkhur lehzual turin a chah a. Motor leh lirthei dang te chu nunna chan phahna ni lova nunpuina leh tangkai taka kan hman theuh theihna turin driver te mai bakah mipui te pawhin mawhphurna sang tak kan nei a ni tiin motor a chuang (passenger) leh kawng a kal (pedestrian) te pawh kan fimkhur tlan takzet a tul a ni, a ti a. Lunglei Traffic Duty Police-te inpekna leh thawhrimna fakawm a tih thu pawh sawiin an hna chu mipui tana rawngbawlna pawimawh tka a ni ti hre reng chunga taima leh fimkhur taka hma la chhunzawm zel turin a chah a. Lunglei mipuite kanlo him zawk theihna tura Polie ten an mamawh hmanrua motor ke kalhna, breathalyzer te pawh an neih thuai theihna tura hmalak pui a tum thu a sawi bawk. Road Safety Week chhung chauh  hi fimkhur nan hmang lovin kumtluana Dan ngaipawimawha fimkhur theuh turin mipuite a chah a ni.

Lunglei Additional DC Pu David Liansanglura Pachuau pawhin thu sawiin  Dan zawm hi fimkhurna pawimawh ber a nih thu a sawi a. Driver-te chu an mawhphurna a san zia hre nawn leh tura chahin an nun uluk tur leh fimkhur taka an hna thawk turin a chah a ni.

Lunglei SDPO Pu F. Vanlalrochana pawhin thu sawiin traffic leh a kaihhnawih chungchangah Lungleiah Dan bawhchhia an tam thu a tarlang a. Traffic Dan bawhchhia leh fimkhur lo taka lirthei khalh, rui chunga motor khalh, motor a dahna hmun lova dah lui te anla tam thu sawiin tun hnaiah Lunglei Police ten Special Drive an neihah ni thum chhung lekin dan bawhchiate atangin fine Rs.20,000/- chuang lai an chawi tir thu a tarlang a. Hemi lama Dan leh thupek kenkawh kawngah Police ten hmanraw hrang hrang motor ke kalhna, Breathalyzer te an mamawh thu a tarlang a. Krismas vuakvet chho ah zin veivak an tam hle a ni tiin, chhungkaw tin ten Krismas leh kumthar hlim taka kan hman theih nan mitinte I fimkhur theuh ang u tiin ngenna a siam a ni.

Road Safety Week pual hian ZDU buatsaih Week Flag chu Lunglei khawpui lun lai ah te zawrh tan mek a ni a, lirthei khalthuten ngai pawimawh a lo lei theuh turin ZDU chuan a ngen a ni.