Naupang ten hri danna an dawn kim theih nana sawrkar laipui hmalakna Mission Indradhanush 2.0 chu vawiin atang khan Lunglei District ah hman tan a ni.

Hawnna inkhawm CMO Office tuala neih chu Lunglei CMO Dr. Thani Pachuauin a kaihruai a, khuallian Lunglei Bawrhsap Pi K. Lalrinzuali chuan thu sawiin Mizoram chhunga District 5 ah Mission Indradhanush chu kalpui a nih tur thu sawiin Lunglei District bikah pawh hmalakna tur a tam avanga thlan tel an nih thu a sawi a,khaw chengker leh kal pawh harsa tak tak atam bakah pemchhuak leh lut an tam avangin naupangte hnena hri danna pek chu hna khirkhan tak tur a nih thu sawiin thawktute pawhin thahnem ngai taka an beih a tul thu a sawi bawk. Mipui mimir pawhin an thatna tur a ni tih hriaa a theih ang anga thawktute tawiawma puibawm turin a sawm nghal bawk a ni.

Senior Medical Officer Dr. Lalrinthangi pawhin an hmalakna leh hmachhawp sawiin India ramah naupang hri danna chi 11 pek mek a nih thu sawiin chi 10 chu Mizoramah pawk pek a nih thu a sawi a. Lunglei khawthlang lam tlang dungte chu kalpawh harsa leh insawn kual reng an nih avanga an target 90% chu tlin a harsat thu sawiin tun tumah hian khaw 34 ah he Mission Indradhanush hi kapui a nih tur thu a sawi a, heng khuaah te hian naupang kum2 chin 188 leh Raipuar 45 te hnenah thla 4 chhunga pek tur an nih tur thu a sawi lang bawk.

Tun tuma vaccine pe tura chhuakte Lunglei DC hian a vailiam nghal a ni.