Social Welfare Minister Dr. K. Beichhua hovin vawiin khan State Guest House, Chaltlangah ruihhlo ngaite enkawl leh chhawmdawl dan  zirhona "Community Consultation for Supportive Engagement"  neih a ni.

Ruihhlo ngaite enkawl leh chhawmdawl dan zirhona leh inrawnkhawmna hi Mizoram Social Defence & Rehabilitation Board buatsaih niin, Mizoram chhunga district hrang hrang atangin Mizoram Drug Users Forum (MDUF) member te bakah Indian Drug Users Forum (IDUF) palaite an tel a ni.

He hunah hian Dr. K. Beichhua chuan thuchah sawiin ruihhlo ngaite'n  khawtlanga thinhrik leh thliarhranna an tawh thin te tihbo a pawimawh hle a nia  ti a, hriselna kawnga hma an sawn nan te, ruihhlo tel lova nun an hman theih nan te uluk lehzuala enkawl an mamawh a ni a ti. Mizoram chunga jail chi hrang hranga tang zinga zaa 50 zel chu ruihhlo ngai an ni tih sawiin, Social Welfare Department chuan anmahni chhawmdawl na tur Prison Project kalpui a tum thu a tarlang a. Drug Users Forum member te fuihna thuchah sawiin, khawtlangah ruihhlo ngaite enkawl leh chhawmdawlna kawngah te, ruihhlo do kawngah te mawhphurhna sang tak an nei a ni a ti bawk.

"Community Consultation for Supportive Engagement"  hi Mizoram-a a vawikhatna a ni a, Resource Person atan Mr. Abou Mere, Senior Adviser (IDUF) & Director, Kripa Foundation, Nagaland leh Mr. Renbonthung Tongoe, National Coordinator, IDUF te hman an ni.

Social Welfare department hotute sawi danin khawvel pumah hian ruihhlo ngaite enkawlna leh chhawmdawlna hian ngaihsak a hlawh tawklo hle a, ruihhlo ngai pasarih zelah mi pakhat chauhin kum khat chhungin enkawlna dawng anga chhut a ni a, Social Welfare Department hnuaia  MSD&RB chuan ruihhlo ngaite enkawl leh chhawmdawl hna hi theihtawp chhuahin a thawk mek a ni.

Vawiin inrawnkhawmna hi hun hnih ah then a ni a, chawhma hun hi Pi Lahlupuii Sailo, CEO, MSD&RB in inlawmna thu sawiin a kaihruai a, Pu Lalduhawma Chawngthu, President, MDUF in keynote address a pe a, Pi A. Vanlalzawni, Director, SWD leh Pi Vanlalpianpuii, Director, Women & Child Development Department ten thu an sawi a ni.