Vawiin chawhnu khan Mizoram Kickboxing Association leh Mizoram State Sports Council buatsaihin 16th Mizoram Kickboxing Championship chu Ramhlun Indoor Stadium ah neih a ni a, Agriculture Minister Pu C Lalrinsanga chu khuallian niin he hun hi a hmanpui.

Minister Pu C Lalrinsanga chuan thalaiten eizawnna ngelnghet leh chhungkaw chawmna tlak thiam thil an neih a pawimawh thu a sawi a, ram changkang zawk ten an economy chawikan nan industry hrang hrang an hman zingah infiamna industry pawhin hmun pawimawh tak a luah thu sawiin,” Mizote hian pianpui thiam thil kan nghah em em a, rimawi leh infiamna lamte hi kan thiam chak hle niin a lang ,” a ti a,” Heng kan talent neihte hi tuai hriam ila, ram pawn thlenga kan phochhuah a sport industry tha taka kan siam theih nan tan ila ang u,” a ti bawk. Pu C Lalrinsanga chuan infiamna a hlawtling tur chuan taksa enkawl that a tul zia leh zuk leh hmuam a fihlim tum tlat turin kickboxing championship a tel tum te chu a chah a,”Infiammite chuan an thinlung an thunun thei tur a ni a, inelna thianghlim kan vawn nun tlat a pawimawh hle bawk a ni,” a ti.

16th Mizoram Kickboxing Championship hawnna hun hi Pu Zothanpuia Sailo, MKA President in a kaihruaia, Pu C Manliana, MKA Adviser in hunserh hmangin Veronica Zothanpari’n demonstration a pe bawk a ni. Mizoram Kickboxing Association hi kum 2004 a din niin tunah hian club 19 inziaklut an awm mek a ni. 16th Mizoram Kickboxing Championship ah hian inelna hi ni 3-5 July, 2019 chhunga neih tur a ni a, Club 8 atangin mi 81 an tel a, semi-contact leh K1 a then niin weight category paruk(6) ah inelna hi buatsaih a ni.