No.7229/2020-2021

Vawiin khan Social Welfare Minister Dr. K. Beichhua chuan No-aotla tlawhin Eklavya Model Residential School (EMRS) sak mek leh Hmaihremzawla leilet te a tlawh.

Hmaihremzawla inkhawmna neihah Dr.K. Beichhua chuan No-aotla loneitu pungkhawmte hmaah thuchah sawiin, COVID-19 hrileng avanga khawvelin hun harsa a hmachhawn mek a ni a. Chutiang karah chuan Chief Minister Pu Zoramthanga kaihhruai sorkar chuan hri avanga kutkuangkuaha awm reng thei kan ni lo tih thupuia neiin minister te chuan kan hma zawn theuhah theihtawp chhuahin ke kan pen theuh a ni, a ti. 


Sorkar flagship programme, SEDP chu vawk leh ar vulh tanpuina ringawt a ni lo tih sawiin, hrileng karah sorkarin hmasawnna ruhrel siam kawngah hma lain, UD&PA department kaltlangin infrastructure thahnem tak siam tawh a ni, a ti a, SEDP hnuaiah vek hian Health Care Scheme changtlung tak kalpui mek a ni bawk, a ti. 

Social Welfare Minister chuan EMRS chungchang tarlangin, Tribal faten a thlawn a zirna tha kan dawn theih nan Central Sorkar, Ministry of Tribal Affairs in min pek a ni tiin, Pawl 6 atanga Pawl 12 thlenga hawn a nih tur thu leh zirlai naupang 480 awm theihna tura ruahman a nih thu a sawi. 

Dr.K. Beichhua chuan No-aotla khawtlang mipuite chu EMRS thatna an hmu hmaih palh ang tih a hlauh thu sawiin, EMRS No-aotla zirlai naupangte chuan Delhi a zirlai naupangte zir ang chiah, CBSE course an zir dawn a ni tih sawiin, Mizoramin IAS hun rei tak kan neih theih loh thu leh EMRS changtlung taka kalpui a nih hunah India ram puma mi thiam tak tak helai bial atang ngei pawh a an chhuah theih a beisei thu a sawi bawk. 

Loneitute chu taima taka thawk chhunzawm zel tura ngenin thlai tharah Siaha khawpui chawm thei tur khawpa hma la chhunzawm zel turin a ngen a, Siaha District COVID-19 Food Security Consultative Committee chairman a nihna angin loneitute tan hma lak chhunzawm zel an tum thu a sawi bawk. 

Dr.K. Beichhua chuan Minister a nih angin a bial chhung mipuiah enhran bik a neih loh zia sawiin, tawngkama sawi a tum loh thu leh thiltiha lantir a tum zawk thu a sawi bawk. 

Siaha district-ah Silk pangang khawi project, Silk Samgara kalpui a nih tur thu Minister chuan a tarlangin, sorkar atanga malsawmna awmte dawng pha turin taima taka hnathawk a, midangte tana malsawmna thlentu ni thei tur leh tun aia nasa zawka thawkrim turin a sawm nghal bawk a ni.

Dr.K.Beichhua hi Sericulture Director Pu Lalrozama, AH&Vety Addl. Director Dr. H. Laltlanmawia leh Siaha atangin official leh party miten an tawiawm a ni.

Attachment

  • Loading attachment...