2934/2022-2023

Aizawl the 3rd December 2022 : Vawiin khan World Disabled Day pualin Social Welfare Minister Dr. K Beichhua chuan SW & TA Complex, Ainawn veng-ah khuallian niin rilru lama rualbanlo damkawrte awmna tur (Rehabilitation home for persons cured of mental illness) a hawng a; Pi Donnie, Joint Secretary, SW & TA department in kaihruaiin Pi Caroline Hmingthanzuali, OSD hnen atangin report ngaihthlak bawk a ni.

Khuallian Dr. K Beichhua chuan thusawiin rilru lama rualbanlo, damdawi in atanga chhuak tawh, hawna tur neilo leh chhungkua/ngaihven zuitu nei lote tana din ‘Home’ hawn a ni thei chu lawmawm a tih thu a sawi a. Khawvel thangchho zel-ah rilru hmanna tam zelin rilru lama buaina (mental illness) a hring chhuak nasa em em a, a enkawlna kawngah mipui, kohhran leh khawtlang tanrual a ngai takzet a ni a ti. Minister chuan Home-a thawkte chu fuihin an hnathawh chu Pathian rawngbawlna dik tak niin, Isua hnathawh chhunzawm zelna a ni tih hre rengin khawngaihna leh inpekna rilru dik tak nena thawk zel turin a fuih a ni. Mizo thalaite zu leh ruihhlo salah an tang nasa lutuk chu runthlak a tih thu sawiin, a ram anga hmalak a hun thu a sawi. Rilru lama damlo/rualbanlote dam tawha ngaihte pawh dam hlen loh palh theih a ni a, vengchhung YMA leh khawtlang mipuite thawhhona an mamawh tur thu sawiin kumina thupui ‘Rualbanlote tel na khawvel i din ang u’ tih chu chhawm nung zel tur leh rilru lama rualbanlote tana khawvel tha leh muanawm siamtu ni zel turin kalte a chah bawk a ni.

Vawiin hawnna inkhawmah hian vengchhung atangin local council member-te, YMA, MHIP, MUP leh social welfare department aiawhte an tel a, Pu Zodailova, Chairman, Local Council Ainawn Veng atangin thusawi ngaihthlak niin Dr. R Lalnunmawii’n lawmthu sawiin hun a khar a ni.