2933/2022-2023

Aizawl 3rd December 2022:  Vawiin khan Mizo Footballer Hranghluite buatsaihin RG Stadium-ah Pu F.Lalroa Memorial Veteran Football Tournament neih a ni a. He Tournament-ah hian Aizawl khawpui Zone 4 atangin Football Veteran kum 45 chung lam Team 4 telin kum 55 chung lam tan Exhibition Match Pu F.Lalroa Teammates vs The Rest 11 ten an khel bawk. Final-ah Aizawl North leh Aizawl South inkhelin Aizawl North Zone an champion a ni.

He tournament puala Function tawite buatsaihah Sports Minister Pu Robert Romawia Royte chuan thusawiin veteran footballers ten pawl mumal tak an din chu lawmawm a tih thu sawiin Veteran Footballer fam ta Pu F.Lalroa nupui Pi Zamanthangi te chhungkuain an pa hriatreng nana Veteran Football Tounament an sponsor chu ropui a tih thu a sawi a. Veteran football tihhmasawn nan sorkarin ruahmanna siamin budget-ah sum ruahman dan kan zawng ang a ti.

He function Pu Laltanpuia, President, Mizo Footballer Hranghluitein a kaihruai a, Sponsor-tu Pi Zamanthangi Pu Lalroa nupui pawhin lawmthu a sawi a ni. He veteran football tournament-ah hian Assembly Speaker Pu Lalrinliana Sailo leh Sports Minister Pu Robert Romawia Royte te pawhin football an khel ve a ni.