2932/2022-2023

Aizawl 3rd December 2022: Vawiin khan International Day of Disabled Persons (Rualbanlote Ni) chu Mizoram New Capital Complex (MINECO), Aizawl ah hman a ni a, Dr. K. Beichhua, Social Welfare & Tribal Affairs Minister chu khuallian niin a telpui.

He Ni pual hian Walkathon pawh neih a ni a, a telte chu MINECO Open Gym bul atangin Administrative Training Institute (ATI) thleng kea kalin, ATI Auditorium-ah kharna hun an hmang nghal a ni.

Khuallian Dr K. Beichhua chuan vawiina Rualbanlote Ni hi khawvel hmun dangte rualin Mizoramah pawh hman a ni thei chu lawmawm a tih thu a sawi a. Mizoram chu Kristian ram a nih ang takin he Ni hi uar zawka, rilru leh thinlung tih takzetna nena hman chhunzawm zel a tul a, mi bik an nih avangin duat tak leh hmangaih takin enkawlin ngaihsak a tul a ni a ti. Mizoram sawrkar pawhin dikna leh chanvo tha an neih theihna turin nasa takin hma a lak mek thu sawiin hna tha tak an hmuh theihna turin sawrkar hnaah hauhsak chin (reservation) siam leh rualbanlote pension pawh kalpui mek zel a ni a ti. 

Minister chuan Social Welfare Department hnuaiah Rualbanlote tan hamthatna hrang hrang, loan an lak ve theihna tur te, chenna in nei lo tan chenna in tha tak siam te, zirna in leh eizawnna tling thiamna pek te chu kalpui mek zel a nih thu a sawi a. Tun hnai khan Braille Press chu Tribal Art Centre, Tanhril ah hawn fel a ni tawh bawk a ti. Accessible India Campaign hnuaiah Mizoram sawrkar office tam takah lift leh ramp, wheelchair hmangte tan dah tawh niin dahbelh tura hmalak mek zel a nih thu a sawi.

Vawiin ‘World Disabled Day’ tana thupui thlan ‘Rualbanlote telna khawvel i din ang u’ tih chu a taka nunpui a hun tawh tak zet tih sawiin Social Welfare Minister chuan vantlang hall, park, zirna in leh infiamna hmunah Rualbanlote tel ve theihna hmun a nih zel theih a pawimawh a ni a ti. Rualbanloten nuam leh hlim taka an tel ve theihna, khawtlang nuam tak din tur leh hmangaihna, lainatna leh duhsak taka Rualbanlote enkawlna kawnga hma la zel turin Mizoram mipuite a chah a ni.

Vawiin ‘World Disabled Day’ hi Social Welfare & Tribal Affairs (SW&TA) leh National Institute for Locomotor Disability (NILD) Regional Centre, Aizawl tangkawp buatsaih niin kharna inkhawm hi Pu K.T. Beicho, Secretary (SW&TA) chuan a kaihruai a; Joint Director (SW&TA) Pi Zodinpuii chuan lawmthu sawina a nei a ni.