Covid-19 natna hrileng avanga harsatna hrang hrang thleng thei lakah Siaha district mipuite lo inven lawkna atan ei leh bara intodelh a pawimawh thu tlangaupuiin Social Welfare Minister Dr. K. Beichhua kaihhruaina hnuaiah party pathum hruaitute khaw hrang hrang fangin an fehchhuak. 

Siaha district-a party pathum hruaitute hi Siaha District Covid 19 Food Security Consultative Committee (SDC-FSCC) ah inphuarkhawmin Siaha bialtu MLA, Dr K Beichhua MNF party chu committee chairman a ni a, Palak bialtu MLA  Pu KT.Rokhaw, INC party leh Mara Autonomous District Council, BJP sorkara Chief Executive Member Pu N. Zakhai te chu Vice-Chairmen an ni bawk a, Secretary-ah Siaha DC ruat a ni. 

Ningani (7th May, 2020) khan Siaha chhuahsanin khawchhak tlangdung Noaotla khua atang bul tanin; vawiin (9th May, 2020) khan a tawp kharin Siaha-ah an let. 

Ni thum chhunga khaw hrang hrang an tlawhkualnaah COVID-19 natna hrileng laka mipuite an himna tura inven a pawimawh thute zirtirin, Myanmar ramria duty te an tlawh bakah hrileng avanga tam tla thei dinhmun atanga ei leh bara mahni intodelh a pawimawh zia uar takin an tlangaupui.

Dr.K. Beichhua chuan Lobo khaw piaha Myanmar ramri a duty te a tlawh pahin tunhnaia North Eastern Council-in project proposal an lo pawm tak, Siaha-Lobo-Tluangram-Hakha road project kalpui tur chu a hmun tlawhin a enfiah nghal.  

Dr.K. Beichhua chuan Siaha district-a  Covid-19 natna hri a luh lohna atana VLTF duty te chu an hnathawh ropui a tih thu sawiin,  lockdown 3rd phase hi inthlahdah palh a hlauawm hun lai tak a nih avangin tha thlah lova theihtawp chhuah chhunzawm zel turin a ngen hlawm a ni. 

Dr.K. Beichhua chuan hrileng chu Tam (famine) in a zui thin thu sawiin, sum hmanga in tanpui theih ni mah se lei tur a awm loh chuan sorkarin min tanpui theih loh hun a thleng thuai dawn, he mi avang hian mahni intodelh a pawimawh a ni, a ti. 

SDC-FSCC Vice-chairman, Palak bialtu MLA Pu KT.Rokhaw pawhin khaw hrang hrang an tlawhkualnaah thuchah sawiin, SDC-FSCC kalphung leh din a nih chhante a tarlang a, mahni intodelh a pawimawh thu uar taka sawi bawkin, ram tan party inthliar lovin lungrual taka ke pen ho a pawimawh thu a sawi. 

SDC-FSCC Vice-chairman tho, MADC, CEM N Zakhai pawhin hmun hrang hranga thuchah a sawiah, tun dinhmunah mahni intodelh a pawimawh thu sawiin, bialtu MDC, MADC Executive Member, MLA leh minister te chunga innghah mai a tawk lova, mahni kuta  thawhchhuahte chu ram tan a ni tih hriaa thahnemngai taka thawk turin District mipuite a ngen a ni. 

Social Welfare minister Dr Beichhua chuan Chhaolo rama sial chaw chinna hmunahte chuan loneituten vaimim an chin tur thu a tarlang bawk.

Myanmar Border duty post a thlawhna leh a kalna khaw tinah Dr Beichhua chuan VLTF duty te chu mask, hand sanitizer leh gloves te a pe nghal bawk.

Siaha Bialtu MLA leh MoS ni bawk Dr.K.Beichhua leh  Palak bialtu MLA, Pu KT.Rokhaw te hian April 2nd Week-ah khan an bial chhung ve ve te lo fangchhuak tawhin, Covid-19 avanga Tam hmachhawn thei kan nih thu leh chu mi atan Buh leh bal chin nasat a tulzia leh kut hnathawh nasat a tulzia  uar takin an lo tlangau pui tawh a ni.

 Dr.K.Beichhua chuan 2nd Week, April thla a a bial a fan zawh khan  Siaha District Covid-19 Food Security Consultative Committee (SDC-FSCC)  din a rawt a, tarik ni 16 April,2020 khan an lo din ta a ni.He SDC-FSCC hian Agriculture and Allied Baseline survey an lo nei tawh a,  hmalakna tur  hmachhawp pawh a nei nual tawh a ni. Dr.K.Beichhua, Chairman ,SDC-FSCC chuan ni 05/05/2020 khan Aizawl atangin Vaimim  chi 80Qtl a lo hawn tawh a. Siaha district chhunga Leilet  siam thar tur leh Leilet   hman lova awm   tawh  te hman thei a siam  leh turin,  Siaha district Earth Movers Association (JCB owners) te nen inbiak fel a ni tawh a,  leilet nana hman tur Tractor pawh 6  dil mek  a ni.  Kar leh atang khian JCB te hian hna an thawh tan nghal theih beisei a ni.

Minister hi Pu FC.Rehmo, MDC, Pu PP.Zalena, President MTP(Gen.Hqrs),Pu M.Baithai,President,MJA,Siaha ten an tawiawm a ni.