Vawiin chawhnu dar 1:00Pm khan Social Welfare Minister Dr.K.Beichhua chuan a Minister  hnua  Siaha District a tlawh hmasak bernaah,  Siaha khawpui a luh hmain  Amôbyu Vaithieh khuaa Evengalical Church of Maraland (ECM) kohhran te din, Ruihhlo Ngaite enkawlna hmun AGAPE HOME (Maraland Rescue & Rehabilitation  Centre) atlawh a. Minister anga Siaha District chhunga a hmun tlawh hmasak ber a ni.

AGAPE HOME a amah puala inkhawm tawi buatsaihah thu sawiin MoS Dr. K. Beichhua chuan ka bial mipui ten Portfolio min beisei pui ang ka han chan loh khan a tir lamah chuan kei pawh ka lunghnur ve deuh va, mahse ka tawngtaina chhanna ka dawn chu :  Pathian hian ka thatna tur lovin ro a rel ngai lo tih hi a ni.

Kan Sawrkar tir phata Kan Chief Minister Pu Zoramthanga Media ten an kawma, a ngaih pawimawh hmasak tur 3 an zawh a, a first priority chu Zu zawrh khap hi a ni.

Chutianga Chief Minister ngaih pawimawh ber Zu zawrh khap leh Ruihlo do buaipuitu  Excise & Narcotics  Dept ka han chang mai te, zu leh ruihlo sala tang tawhte chhanchhuaka, chhawmdawlna hna thawktu  Social Welfare Dept ka han chang leh zel te hian ka rilru-ah tun hma atanga ka lo vei em em leh phak tawka  hma pawh ka lo lak ve tawh thinna hmunah chak zawka hnathawk thei turin  Chief Minister kaltlangin Pathian hian  min lo hung reng a ni hi, tiin  ngaituahna thar leh  tumruhna thar nen chak tak leh huaisen taka ke pen zel  turin rilru ka siam fel ta a ni, a ti. AGAPE HOME Managing Board aiawha thu sawitu Rev.Dr. Lai-u Fachhai chuan AGAPE HOME chungchangah report pein, nikum July thla atanga he Home hi kalpui tan chauh a ni a. Dr.K.Beichhua hian Ruihhlo Ngaite hi a vei em em thin a. A  tirte atangin  min phurpuiin min tanpui nasa a, a ram zauhbelhna tur pawh amah min leisak a ni, a ti.   He Home-ah hian Tisa leh Thlarau lam damna piah lamah inmates ten ei zawn nana an hman thei tur thiamthil hrang hrang an zirtir dawn a ni. Minister chuan AGAPE HOME chu a theihna ang anga tanpui zel a tum thu a sawi lang bawk. 

Minister hian AGAPE HOME atang hian Siaha Bazar Traffic Point a pan nghal a. Bazar Traffic Point-ah hian mipui tam takin  an lo hmuak a.  Minister chuan Traffic Point-ah hian thu sawiin Pu Zoramthanga Kaihhruai Sawrkar hian Gov't of MNF a siam dawn lo va, Mizoram chhunga cheng mitin te huapzo Gov't of Mizoram a siam dawn a ni.  Chuvangin Party aiin Ram hi i dah pawimawh zawk theuh i la, party rilru paihin  'Keini- Nangni' tih tawngkam aiin 'Kan' tih tawngkam nen lungrual takin kan District leh  Mizoram State hmasawnna tur rahbi i tuk tlang ang u, tiin mipui kalkhawm te a sawm a ni.

Bazar Traffic Point atang hian Minister hian MADC hruaitute leh officer te, GoM hnuaia  Head of Office te, Tlawmngai pawl hrang hrang hruaitute, Party hrang hrang hruaituten  an lo hmuahna Circuit house a pan ding nghalin, amah puala MADC CEM Pu N.Zakhaiin  chawhlui a lo buatsaih sak chu a  lo hmuaktu te nen an kilho nghal a ni.

Minister of State Dr.K.Beichhua hi a nupui Dr.Zochhuanawmi leh a puzawn  H.Thangkima Ex-Minister te bakah Aizawl atangin Pi Vanlalpianpuii,Jt.Director.SWD, Pu  Lalthankima, AE, SWD, Dr.F.Laldawla,Dy.Director, AH&Vety, Pu Rozawna,  Jt.Director Sericulture ten an lo tawiawm a. Minister hian Ni 21/1/2019 thleng khian a bial a fang dawn  a ni.