2195/2023-2024

Dated Serchhip, the 6th October, 2023: Vawiin khan Social Welfare Minister Er. Lalrinawma, Tuikum Bialtu MLA ni bawk chuan Chhuanthar Tlangnuam Panchayat Bhawan leh Baktawng Government P/S -I Building thar a hawng a. Chhuanthar School Lumpsump GIA a hlankai lawmna hun a hmanpui bawk a ni.

Khuallian Er. Lalrinawma chuan thu sawiin Chhuanthar khawtlangin hmasawnna rotling leh chhinchhiah tlak tak an nei thar chu a lawmpui a, a ennkawl zuina kawngah neitu rilru pu theuh zel turin a sawm a, amah ngei pawh a lo kal tawhna school ngei hawng theia a awm chu lawmawm tiin hriatreng tlak a tih thu a sawi a ni. Bial a vil leh enkawl zuina kawngah eizawnna, zirna leh hriselna te chu a ngaih pawimawh zual a nih thu sawiin, bial leh khawtlang hmasawnna hnathawh leh hmalaknaah thawh hona tha an neih thin avangin bial mipuite chungah lawmthu a sawi a. Bial mipuite hnen atanga duhsakna tinreng a dawn thin te chu lawmawm a tih thu a sawi bawk a ni.

Minister Er.Lalrinawma chuan a bial chhunga hmasawnna ruhrel dinthar te chu mipuiten neitu rilru pu chunga an lo enkawl zui thin avangin lawmthu a sawi a. A bial chhung zirna in thahnem tak dinhmun tha zawka hlankai a ni chu lawmawm tiin hriselna lamah pawh hmasawnna tam tak hmuin tihchangtlun a ni chho zel chu lawmawm a tih thu a sawi a ni. Tha taka hna an thawh thin avangin a bial mipuite hnenah lawmthu a sawi a, vantlang thilte ngai pawimawha, mipuiten a tul hunah tha an thawha, sawrkar an thlawp thiam zel a pawimawh a ni, a ti. Hmasawnna lo kal tur te an dawnsawn thiam a that thu sawiin, Er.Lalrinawma chuan VC te leh School a thawktu zawng zawng te inpekna ropui a tih thu a sawi a, tih fuh tawk loh deuh te a lo awm a nih chuan hriatthiamna a dil nghal bawk a ni.

Chhuanthar Tlangnuam VCP Pu Lalramzaua chuan kalkhawmte lawmna thu sawiin, bialtu MLA hmalaknaah lawmthu a sawi a. Serchhip District LAD hnuaia Panchayat Bhawan (RGSA 2020-2021) thar leh khawtlanga mi tam zawk eizawnna nen a inzawm tlat Tranformer thar an nei thei chu lawmawm a tih thu a sawi bawk a. P/S-I Lumpsump GIA a hlankai a ni chu lawmawm a tih thu sawiin bialtu MLA leh Sawrkar hmalakna-ah mipui aiawh pawhin lawmthu a sawi bawk a ni.

Baktawng Government P/S-I Building Committee Chairman Pu H. Remmawia leh sawm bikten he hunah hian thu an sawi a. VC Vice President Pu Ramthanga chuan programme hi kaihruaiin Upa C. Lalrinthanga’n hunserh a hmang a. VC Member Pu B. Lalngaihawma’n lawmthu sawiin hun hnung a khar a ni.