2196/2023-2024

Aizawl, the 6th Octuber, 2023: Lok Sabha MP Pu C.Lalrosanga chuan vawiin chawhma dar 11 khan Saansad Adarsh Gram Yojana (SAGY) Phase VII hnuaia Model Village atana a thlan Muthi tlawhin hmalaknate a enfiah a, BDO Tlangnuam RD Block & Charge Officer, SAGY Phase VII buatsaih Model Village puala Muthi Community Hall-a program buatsaih chu khuallian niin a hmanpui a, internet chak zawk an neih theih nan Bharat Net a hawng nghal bawk.

Khuallian Pu C.Lalrosanga chuan Muthi Model Village-a Line department hrang hrangte hmalakna atanga hlawhtlinna hmuh a ni chho zel leh ruahmanna awmsa atanga 80% zawhfel a ni chu lawmawm a tih thu a sawi a. Nodal Officer Aizawl DC, Charge Officer & BDO Tlangnuam, Line Department leh khawtlang mipuite thawhhona ropui a tih thu sawiin, SAGY chu India ram thingtlangte tihhmasawn nana Prime Minister ruahman scheme ngaihpawimawh tak a ni, a ti a. India rama SAGY Model Village 3,341 zinga.Muthi a tel chu khawtlang tana malsawmna a nih thu a sawi a. Hemi atana hmalakna tur Village Development Plan duante chak taka bawhzui a ni chu lawmawm a tih thu a sawi bawk.

Lok Sabha MP chuan Sawrkar laipui scheme-te tangkai taka hman a nih thin thu sawiin, Mizoram chu a chhawr tangkai berte zinga mi kan ni, a ti a. Hmasawnna rahbi hrang hrang siam tawhte bakak internet chak zawk neihna tur Bharat Net tlangzarh a ni chu Muthi khaw tana pawimawh tak a nih thu sawiin, opticalal fibre hmanga internet chak zawk pekna tur chu zirlai puitu mai bakah a tangkai thei ang bera hman a nih ngei a beisei thu a sawi a. Hemi kawnga hmalatu BSNL leh Telecommunication lama thawktute chungah lawmthu a sawi bawk.

Thusawitu dang SAGY Nodal Officer Pi Nazuk Kumar, IAS, Aizawl District Bawrhsap chuan SAGY awmzia tlangpui a sawifiah a. Hemi hnuaiah hian line department hrang hrangte thawhhona hnuaiah khawtlang mamawh leh tulte sawiho niin, chungte chu bawhzui thin a ni a ti a. SAGY Model Village atana thlan leh hmasawnna hrang hrang dawngtu Muthi khuain Lok Sabha MP duhsakna a dawng chu lawmpuiawm a tih thu a sawi a. Tul leh pawimawh dangte thuneitute hnena thlen hrehlo turin a chah nghal bawk.

He hun hi Muthi VCP Pu Kaphmingthanga chuan kaihruaiin Upa C.Laithianga'n hunserh a hmang a. Pu Mukul Beniwal, IAS, Charge Officer & BDO Tlangnuam leh Charge Officer & BDO Tlangnuam kalchhuakta Pi Jennifer Vanlalhruaii Pachuau, MCS te hnen atangin hmalakna hrang hrangte ngaihthlak a ni a. Pu Biakthianghlima Chenkual, DGM, BSNL in Bharat Net chungchang a sawifiah a, Line Department hotute atangin an hmalak dante ngaihthlak a ni bawk a. Pu Laltanpuia, Muthi VC Vice President-in lawmthu sawiin hun hman a khar a ni. Program hman zawh hnu hian BSNL te'n Bharat Net tlangzarh tak hnathawh dan atakin an entir nghal a ni.

Muthi khua hi July ni 21, 2020 khan Lok Sabha MP Pu C.Lalrosanga chuan SAGY Model Village atan a thlang a. SAGY Phase VII kaltlang hian MP leh MLA Fund bakah line department hrang hrangte kaltlangin khawtlang mammawhte chhawpchhuah a ni a. Village Development Plan (VDP) project 41 kalpui tura ruahman zingah 33 (80%) zawh tawh niin, project kal mek 3 bakah la thawh tur 5 a awm mek bawk a. Hmalakna langsar zingah Street lights vuah, Thlanmual In sak, Pec Flooring approach to Govt. LMM Middle School siam, Anganwadi Teachers training, Nutri-Garden enkawlna te, Eco Adventure Circuit under Eco Circuit Theme sak te, Art & Culture Public Relations and Outreach Programme leh Health Camp buatsaih te, Career Guidance/Awareness, SAGY leh ICT chungchang inzirtir te, Solar Pumping Muthi Water Supply Scheme siam te, Folk Artist Training Music kalpui te, Vermi-Composting leh bawlhhlawh sawngbawl dan inzirtirnate leh thil pawimawh tak takte kalpui a ni.