2197/2023-2024

Champhai the 6th October, 2023 - Champhai zirlaite leh thalaite an hmalam hun kawhhmuhna leh hna hrang hrang chungchang inzirtirna hunpui ni hnih awh– ‘Champhai Rahbi – Career Expo & Job Fair’ chu vawiin khan Government Champhai College Multipurpose Hall-ah neih chhunzawm niin, Champhai South bialtu MLA & EF&CC etc changtu Minister Pu TJ Lalnuntluanga chuan a hmanpui a ni.

Minister Pu TJ Lalnuntluanga chuan ‘Champhai Rahbi – Career Expo & Job Fair’ chu Champhai thalaite rahbi thar thlentu leh eizawnna hrang hrang bultan tura an inpuahchahna kal mekah kawng kawhhmuhtu leh an rilru ti zau tu anih ngei a beisei thu a sawi a. Zirna leh eizawnna kawng hrang hrangah Champhai District tan rualawhna tur a tam hle thin a ni tiin hemi kawnga Champhai District thalaite mamawh phuhruk anih theihnan Minister chuan Planning Department leh Department dangte hnenah an thlen thu a sawi a. Champhai thalaite tana an rualawhnate Planning Department, LESDE leh MYC ten tha taka chhangletin program lian tham leh tangkai tak an rawn ti puitling ta chu lawmawm tiin, a buatsaihtu Department-te chungah lawmthu a sawi a ni.

A sawi zelnaah Minister chuan Career Guidance kalpui danah hian lehkhathiam te leh sawrkar hna zawm tumte kaihhruai lamah kan kal uar viau thin a. Hei hi a that tho laiin, Sawrkar hna leh hna sangte a tlem zia leh kan indaihlo zia chu kan hre tlang vek a. Chuvangin a nawlpui ban phak eizawnna kawnga kan inkawhhmuh chhoh tel hi a tul takzet a ni tiin, he Career Expo & Job Fair-a stall te chu huamzau taka duang a ni, a ti a. Thalai tam tak chu an hmalam hun atana an eizawnna tur anlo ngaihtuah thin loh avangin beidawnna khurah an lut fo thin chu pawi a tih thu sawiin, Minister chuan thalaite chu mahni eizawnna theuh chu an chanvo leh an mawphurhna tih hrechiang a, tun atanga tum mumal nei a, chhungkua, khawtlang leh ram tana chhawr tlak nih tum turin a chah a. Eizawnna an dap kawngah harsatna, hrehawmna leh beidawnna te pawh anla hmachhawn fo thin dawn ti hriain, an rilru ti khauh tlat a, huaisen taka hma la chho turin a fuih a. Career Expo & Job Fair-a stall hrang hrang te uluk taka fang chhuaka, stall nghaktute pawh chik taka an hriatduh te zawt turin a chah a ni.

‘Champhai Rahbi – Career Expo & Job Fair’ program ah hian GCC thawktute, sawrkar official-te leh zirlai thahnem tak an tel a. Pu RK Hnuna, Director, ZoCareer chuan Career Guidance chungchang zirtirna pe in, Pu Zoramchhana, Entrepreneur chuan entrepreneurship lama a hmalak dan te zirlaite hmaah a sawi a. Zirlaite tan Youth Challenge intihsiakna hlimawma tak leh Quiz te neih niin, Pi Chingthanmawi Guite, Deputy Adviser cum Deputy Secretary chuan lawmthu sawina hun a hmang a ni.

‘Champhai Rahbi – Career Expo & Job Fair’ hi Mizoram Startup Mission, Planning & Programme Implementation Department, Labour, Employment, Skill Development & Entrepreneurship Department, Mizoram Youth Commission leh Government Champhai College-te tangkawp buatsaih a ni.

Champhai Rahbi hi hnih chhung (5th – 6th October, 2023) a awh a. Government Champhai College Multipurpose Hall bulah hian stall hrang hrang ruahman a ni a. Hotel Management, Nursing, Bestway Network Marketing, Bank hrang hrang, LIC, Mission Foundation Movement, Jay Jay Training & Placement, Suzuki leh Hotel ten stall an siam a. Heng stall-ah te hian hna hrang hrang chungchang inzirtirna leh kawng kawhhmuh mai bakah hna lak leh placement thlengin an ti thei a. Foreign lama hnathawk duh tan te pawh foreign placement thlengin an tanpui thei a.

Champhai Rahbi hi zirlaite leh thalaiten an hlut hle a, tlawh tu an thahnem hle a ni.