Dated Aizawl, the 02 September 2026: Nimin khan SOCIAL WELFARE WOMEN AND CHILD DEVELOPMENT DEPARTMENT changtu Minister Pi Lalrinpuii chuan Dawrpui Multi-purpose Centre, Aizawlah, Mizoram Sawrkar leh TOYOTA KIRLOSKAR MOTOR Pvt. Ltd. ten CSR kaltlang a hma an lak thawh khatna hnuaiah, Aizawl leh Lunglei District chhunga mit khaw hmuh lama harsatna neite tan a bika siam tiang (Safe Mobility Device) chu khuallian niin a sem.

Device semna puala hun hmanah hian khuallian Social Welfare, Women & Child Development Department changtu Minister Pi Lalrinpuii chuan thusawiin, Sawrkar leh Toyota Kirloskar Motor ten thawhhona tha tak neia Safe Mobility Device an sem thei chu lawmawm a tih thu a sawi a. Mizoram Sawrkar chuan Pianphunga Rualbanlote tana hamthatna awm thei ang angte hai chhuahpui leh an hmasawnna tur ngaihtuah chu a ngai pawimawh hle tih sawiin, ‘hemi lama hma la tur bik Commission pawh a din hial a ni’ a ti a. Minister chuan ‘India ram chu Welfare State a nih ang leh ram Danpui pawhin chiang taka a tarlan angin, hetiang lama hmalaknate hi Sawrkar mai bakah mi tinte mawhphurhna a ni’ a ti a. Department mi leh sate thawhrimna chu fakawm a tih thu sawiin, kohhran, khawtlang leh ram inrelbawlnaahte thleng pawhin chanhai zawk ten lei rem an rah ve theihna tura remchang siamsak chu mi zawng zawng mawhphurhna a ni tih a sawi a. Device dawngtute chu hmasawn zel tura rilru tipaukhauh tur te, an thlen chin atanga hmasawn zel tur tea duhsakna hlanin, Minister chuan Sawrkar chu mi zawng zawngte tana ding a ni tih hre reng turin kalkhawmte chu a chah nghal bawk a ni.

He hun hman hi Pi Zonunthari, SW&WCD Department Joint Secretary chuan kaihruaiin, kalkhawmte lawmna thu a sawi a. Social Welfare Department Director Pu Vivek Kumar Tripathi chuan Mitdel Tiang sem chhuahna tura Department hmalaknate sawi zauvin, Alien Innovations atangin Pu Ravi chuan kalkhawmte hmaah hian Device hman dan tur chu a takin a entir a. Pu Roshan R, General Manager, TKM chuan Mizoram sawrkar nen tangho leh CSR kaltlanga Mizorama hma an lo lak tawhna thenkhatte a sawi zau bawk a. Pi Caroline Hmingthanzuali, Joint Director, Social Welfare Department chuan lawmthu sawiin hun hi a khar a ni.