1268/2026-2027

Dated Aizawl, the 02 July 2026: Vawiin khan Social Welfare, Women & Child Development Department changtu Minister Pi Lalrinpuii hovin SAD Conference Hall, MINECO-ah, Social Welfare, Women & Child Development Department leh Toyota Kirloskar Motor-te chuan, Mizorama mitdel ten zirna kawnga hma an sawn theihna tura thawhdunna thuthlung (MOU) an ziak a. MOU hi Mizoram sawrkar aiawhin Pi Lalzarmawii, Commissioner&Secretary, SW, W&CD leh Toyota Kirloskar Motor aiawhin Pu Ramesh Rao, Vice President- External Affairs&CSR te chuan an sign a ni.

He hunah hian Social Welfare, Women & Child Development Department Minister Pi Lalrinpuii chuan thusawiin, Mizoram Sawrkar leh Toyota ten thawhdunna thuthlung pawimawh tak an ziak thei chu lawmawm a tih thu a sawi a. Minister chuan vawiina ziah tak thawhdunna thuthlung chu a lo zik chhuahna tar langin, amah ngei Bhubaneswar City Knowledge Innovation Cluster (BCKIC)te buatsaih CSR & Sustainability Conclave 2025-a a tel ve tumin Toyota hotute nen inbe chhunzawm a vawiin dinhmun chu lo thleng ta an nih thu a sawi a. Minister chuan Mizoram chhunga khaw hmuh lama harsatna neite chuan zirna mai bakah eizawnna kawngah harsatna an tawk nasa hle tih tar langin, chung harsatnate chu theipatawpa sut kianpui tura hma lak chu mi tin mawhphurhna a nih thu a sawi a.hmasawnna huapzo hnuaiah mimal tinin zirna tha an dawn theih nan te, mahni intodelha khawtlang hnena pek let an neih theih nante Mizoram sorkar leh Toyota Kirloskar Motor thawh dunna chu rahbi pawimawhtak a nih ngei a beisei tlat tih a sawi bawk.

Vawiina hun hmanah hian Toyota Kirloskar Motor, Corporate Affairs-a Country Head & Executive Vice President, Pu Vikram Gulati pawhin thu sawiin, mihring chet velna tihawlsam chu mihring theihna paw chhuak tura pawimawh hmasa ber pakhat a nih thu a sawi a. Tunlai thiamna hmanga mihringte'n mahni inrin tawkna nena hna an thawh chuan nghawng thui tak a neih thu sawiin, Mizoram sorkar nena an thawh dunna hnuaiah chuan nitin khawsak tiawlsam turin khawl leh hmanraw changkang tak takte hmang tangkaiin, danglamna thlen dawrh hmasawnna a hrin chhuah ngei a beisei tih a sawi bawk.

Tun dinhmunah Mizoramah hian khaw hmuh lama harsatna nei mi 2,035 awm mekin an zinga zaa pakhat vel chauhin eizawnna mumal an nei nia hriat a ni a. Vawiina ziah tak Mizoram sorkar leh Toyota Kirloskar Motor-te thawh dunna hnuaiah hian a thawh khatna atan Special Blind School, Durtlang hnenah Navinaut Assistive Mobile Device 250, Braille computer, printer leh AI scanner pek a ni dawn a. Thawh khatna dinhmun thlir chungin thawh hnihna-ah Navinaut Assistive Mobile Device hi 930 sem chhuah belh leh tura ruahmanna siam a ni bawk a. He khawl hian khaw hmuh lama harsatna neite tan chet velna bakah zirna leh thil danga mi dang rinchhan lova thil an tih theih nan a pui dawn a ni.

Vawiina Thawhdunna Thuthlung ziahnaah hian Social Welfare, Women & Child Development Department atangin Commissioner & Secretary Pi Lalzarmawii te, Pi Zonunthari, Jt. Secretary leh hotu pawimawh dangte bakah Toyota Kirloskar Motor, Corporate Affairs atangin Country Head & Executive Vice President Pu Vikram Gulati te, TKM Vice President, Ramesh Rao leh Sachin Sharma-te, Zote Toyota Dealer Principle, Pu Zorammawia bakah thawktute thahnem tak an tel a ni.