1267/2026-2027

Dated Aizawl, the 2nd July, 2026 : Vawiin khan IPRP&S Minister Pu B Lalchhanzova chuan I&PR Conference Hall, Lianchhiari Run-ah Press Information Bureau (PIB), Ministry of Information & Broadcasting, Government of India buatsaihin Inter-Media Publicity Coordination Commitee (IMPCC) Meeting a hmanpui.

Pu B Lalchhanzova chuan tunlaiah information a darh chak tawh em avangin information dik lo laka inven nan thawhona mumal tak neih a pawimawh a; chuvangin, IMPCC chu sawrkar laipui leh state sawrkar te nena thawkhoin, mipuite hnena thu dik tak pek chhuah kawngah an pawimawh thu a sawi a. Media te chu sawrkar policy leh scheme hrang hrang Mizo tawnga lehlin te, an platform-ah kuthnathawktute tilang tam turin leh information chu mi zawng zawng huapzo a ni tur a ni, a ti. Tunlaiah thuthang dik lo a darh chak em avangin media te chu an thuchhuah reng reng an website leh social media hrang hrangah rang tak leh thu dik tak chauh pe chhuak thin turin a fuih a, mipuite rin ngam ni thei turin a fuih bawk a ni.

Minister chuan saptawnga thu chhuah thin media te chu Mizoram tourism than nasatzia tarlang tam turin a chah a. Aizawl khawpui chu traffic dan leh dun ngai pawimawh thin khawpui a nihna te, honking free leh Silent City a nihna te, khualzin hmeichhia te tana hmun him ber pawl a nihna te tarlang tam turin a chah a. Thenzawl Peace City-a golf course leh ropeway project vaibelchhe 36 man tura duan mek te chu India ram pumpui tan thu lawmawm a nih thu a sawi. Mizoram chu Winter Capital of India atana hmun duhawm a nih thu leh Indian Tourism Development Council (ITDC) leh Central YMA nena thawkhoa ‘Tribal Homestay’ a kalpui leh sustainable tourism lama a hmalakna dangte chu puang darh nasa turin media te chu a fuih bawk a ni.

DDK (News) Mizoram Director leh IMPCC Chairman ni bawk Pu Nampibou Miranmai, IIS pawhin thu sawiin IMPCC chu media te leh sawrkar department hrang hrangte thawhona platform pawimawh tak a ni a, IMPCC hmang hian mipuite hnena thu thar sem chhuah kawngah media hrang hrangte chu thawhhona tha an neih ngei theih a beisei thu a sawi. Kalkawmte chu sawihona tha tak nei turin duhsakna a hlan a ni.

IMPCC hi Ministry of Information & Broadcasting in a din a ni a, state tina media te nen thawkhoin sawrkar department hrang hrang hnathawhte mipui hnena puan chhuah kawngah hna a thawk thin a ni. Vawiin meeting hi kumina a vawi hnihna a ni a, June thla khan AIR Conference Hall-ah meeting lo neih tawh niin, August thla hian meeting neih leh tum a ni. Vawiin meeting-ah hian Mizo tawng bakah English leh Hindi-a thu chhuah tam te, Mizote GST lam inhrilhriat tam te, ruih theih thil thatlohna hawi zawng information pek chhuah tam te sawiho a ni.

He meeting-ah hian DDK, AIR, I&PR SPMU IOCL, National Tobacco Control Programme, MSME, CGST, FCI, Census Operation hotute an tel. I&PR Director leh IMPCC Co-Chairperson Pi K. Vanlalsangi’n kalkhawmte lawmna thu a sawi a, Joint Director Pi Mina Zoliani Joute chuan meeting hi kaihruaiin, PIB Aizawl Head of Office Dr. Rajeev Lourembam chuan lawmthu sawiin he meeting hi a khar a ni.