Ram pum huapa rulhut beihpui thlakna ‘National Deworming Day’ (NDD) chu Social Welfare Minister Dr.K.Beichhua hovin Synod Higher Secondary School-ah neih a ni a. National Health Mission, Health & Family Welfare buatsaih a ni.

Minister Dr.K.Beichhua chuan National Deworming Day (NDD) hi India ramah kum 2015 ah khan State/UT 11 ah bul tan a ni a, chumi hnuah India ram pumah February 2016 atang khan hman chhunzawm a ni, a ti a. Sawrkar laipui pawhin a ngai pawimawh hle a, vawiin hian India ram hmun dangte rualin National Deworming Day kan hmang a ni, a ti a. National Centre for Disease Control (NCDC) in a zir chiannaah Mizorama rulhut pai thei dinhmuna ding naupang (Soil Transmitted Helminth Prevalence) chu 51%  a ni a, hei vang hian NDD hi kum khatah vawi hnih kan hman a ngai a ni, a ti a. Zirlai kalkhawmte chu fuihin rulhut pailo tura kan tih theih awlsam te chu kut silfai that te, thlai leh thei ei tur silfai that te, tui thianghlim in te, ekin tha leh thianghlim tak a inthiar te, eitur khuh that te leh in leh a vel vawnfai te a ni, a ti a. Minister chuan rulhut laka invenna atana hmalakna hi kan hlutin kan ngaih pawimawh a ngai a, vawiin nia ei thei lo tan pawh February Ni 14, 2019 (Mop Up Day) ah ei theih a ni leh dawn a ni tiin kum 1-19 inkar zawng zawng chu rulhut damdawi ei turin a sawm a ni.

He hmalakna hi rulhut pai vanga natna hrang hrang thleng thei te, thisen tlakchhamna te leh naupang thanthu um bo nan a ni a, kum 1 – 19 inkar tan kum tin vawi hnih (2) (February leh August-ah) anmahni kalna sikul leh anganwadi-ah rulhut damdawi Albendazole a thlawnin pek thin an ni a. Sikul kallo pawh Anganwadi-ah pek vek an ni.

Programme hi National Health Mission Director Dr. Lalrozama, IAS chuan kaihruaiin kalkhawmte lawmna thu a sawi a. Reproductive and Child Health (RCH)  State Program Officer Dr. Hmingthanmawii chuan National Deworming Day chungchang sawina hun a nei a. Social Welfare Department Dy.Director Pi Zoramthangi leh Synod HSS Principal Pu Lalvena Hnamte chuan thusawina hun an nei a. Directorate of Health Services Jt.Director Dr. Vanlalsawma chuan  lawmthu sawina in hun a khar a. Minister chuan naupang thlanchhuah hnenah damdawi hi a sem nghal a. Health Department, School Education Department, Social Welfare Department, Rural Development Department leh Public Health Engineering Department thawhhona hnuaia National Deworming Day hi kalpui thin a ni.