2271/2025-2026

Dated Aizawl: the 18 November 2025 : Vawiin khan Nasha Mukt Bharat Abhiyaan (Drug Free India Campaign)-in kum 5 a tlin lawmna pualin Ministry of Social Justice & Empowerment, Govt. of India chuan Prime Minister Event, Amritsar-ah a buatsaih a. A hmunah leh online-in he hunah hian India ram Prime Minister Pu Narrendra Modi leh i/c Ministry of Social Justice & Empowerment, Govt. of India bakah State tina Chief Minister te leh Sorkar mi pawimawhte chu ko kim takin an tel a ni.

Mizoramah pawh State Level Nasha Mukt Bharat Abhiyaan chuan he hun hi Lianchhiari Rûn, I&PR Conference Hall ah a buatsaih a. Pi Lalrinpuii, Hon’ble Minister, Social Welfare chuan ruihhlo do chungchanga hriattur pawimawh leh mi tin mawhphurhnate a sawi a. Mizoram sawrkar ang pawha, tlawmngai pawl leh kohhrante nen tang hova ruihhlo chu nasa taka do a ni tih sawiin, Zirlai rual kalkhawmte chu ruihhlo laka fihlim zel turte, ruihhlo chu mihring hmasawnna daltu lian ber leh nun titawitu a ni tih hre reng turin a chah a. Mizoram chu a awmna hmun avangin ruihhlovin a run nasa bik hle tih tar langin, a do let tur leh nakin thlenga ram leh hnam hma hun vawngtu tur chu vawiina zirlai leh thalaite an ni tih a sawi a ni.

Pi Lalzarmawii, Commissioner & Secretary, SWD, WCD pawhin Nasha Mukt Bharat Abhiyaan chungchang sawizauin Sawrkar hmalakna hrang hrangte a tarlang bawk a ni.

 Nasha Mukt Bharat Abhiyaan hi India ram chhunga State 28 leh Union Territories  8 ah kalpui mek niin, District zawng zawng a tuam chhuak vek bawk a. District tina  Deputy Commissioner te kaihhruaina hnuaiah ruihhlo la ti ve lote venhim an nih  zel theih nan leh a ti tawhten enkawlna an dawn theihna turin hma an la mek  bawk a ni. India ram hmun hrang hranga mi a tam thei ang berin vawiina hun  hman hi an chhim theihna turin online-in buatsaih a ni a. Sorkar department hrang hrang, zirna in hrang hrang te leh ruihhlo dona atana NGO pawl hrang  hrangte pawh sawm an nih angin online in an tel a ni.