3628/2024-2025

Aizawl, 3^rd December, 2024 : Vawiin hi khawvel pum huap “Rualbanlote Ni” (International Day of Persons with Disabilities) a ni a. He ni denchhen hian Aizawl-ah Social Welfare Minister Pi Lalrinpuii hovin hun hman a ni.

“Rualbanlote Ni” denchhen hian Social Welfare & Tribal Affairs Department, Federation of Mizoram Disabled Organisations (FMDO) leh National Institute for Locomotor Disabilities- Regional Centre tangkawpte bul tumin rualbanlote, an chhungte, an pual a hnathawktute leh anmahni ngaihventu zirlai leh mipui engemawzat te nen Canteen Kual atangin Zarkawt Recreation Centre thleng kawngzawh a ni. Zarkawt Recreation Centre ah official programme tawi hman a nih hnu in inclusive concert neih a ni. He hun ah hian rualbanlo te’n music band, zai , lam leh skit te hmangin an thiam an tarlang a, tunlai zaithiam engemawzatin kalkhawm te an awi bawk a ni. He ni denchhen a Spastic Society of Mizoram in Lucky ticket a siam pawh vawr a ni.

Zarkawt Recreation Centre-a Rualbanlote Ni puala inkhawm buatsaihah hian khuallian Pi Lalrinpuii chuan thu sawiin, tunhma lam kha chuan mizo khawtlangah rualbanlote enhniamna leh nawmnah taka chhawnchhaiha, nuihza siam nana hman te kan ching nasa e mem a, hei hi ngaimawhin upate’n ‘Piansualin tlai luat a nei lo’  tiin min zilhhau thin a nih kha. Pianphunga rualbanlote dinhmuna din chu duh lo vek mah ila anmahni dikna leh chanvo lam erawh chu kan ngaihthah leh hle si ni hian a la hriat a ni, a ti a. Tunhnuah sawrkarin chak takin hma a la chho a, Persons with Disability Wing hnuaiah Commissioner te hial kan nei ta a, mipui dawr thin department te leh sawrkar hmun pawimawh chi hrang hrangah pianphunga rualbanlote tan kawng awlsam ramp, signage leh a dangte a awm tha em tih vil rengin theihrtawp an chhuah a, an hmalakna hian rah tha a chhuah mek zel a ni a ti.

Pi Rinpuii chuan sawrkar hnalak dawn reng rengin rualbanlote pualin 3% reservation kan nei thei ta hial te hi hmasawnna a ni a, hna pangngai thawh mai ni tawh lovin pianphunga rualbanlote hian kan tling tawka, theihna kan nei a ni tih lan tir theih nan kumin thupuiah pawh “Amplifying the leadership of persons with disabilities for an inclusive and sustainable future” kan hmang a, hetiang tak hian a tha zawnga midang kaihruaitu ni thei tura tan la sauh sauh turin kalkhawmte a sawm a ni.

Lunglei, Siaha leh Champhai ah te pawh District Social Welfare & Tribal Affairs Office bul tumin he ni pual hian hun hman a ni.

Khawvel Rualbanlote Ni in zirtir a tum bulpui - rualbanlote lenna khawvel din tur a kal khawm zawng zawng te chungah Social Welfare & Tribal Affairs , Women & Child Department chuan lawmthu a sawi tak meuh meuh a ni.