Vawiin chawhma khan White Stone Conference Hall, Ramhlun Venglaiah Mizoram ICDS Child Development Project Officer (CDPO) Association (MCDPOA) ten an annual general conference vawi 23-na an hmang a. Social Welfare Minister Dr. K. Beichhua chu Khuallian a ni.

Khuallian Dr. K. Beichhua chuan thu sawiin social welfare department, a bik takin CDPO ten mawhphurhna sang tak an nei a ni tiin CDPO ten in pawimawhna hi in hriatchian a pawimawh a ni, a ti a. CDPO-te chuan nausen atanga kum upa tak tak thleng hamthatna an ngaih pawimawh thin thu sawiin CDPO hna, midang tana inpekna chu hna ropui tak a nih thu a sawi a. Kan enkawlte hi ngaihtuah chiang ila, nu pum chhunga awm naute leh pianphunga rualbanlo thlengin kan buaipui a, kan hna hi dawngdah taka thawh mai mai theih a ni lo a ni tiin thahnemngai taka thawk turin kalkhawmte chu a fuih a. Khawvela mi ropui berte chu mahni hna tui leh rinawm taka thawkte hi an ni, a ti a. Conference chuan rah tha tak a neih ngei theih nan duhsakna a hlan nghal a ni.

Conference hi MCDPOA President Pu R. Laldinliana, CDPO Lunglei chuan a kaihruai a. General Secretary Pu C. Chhundenga atangin report ngaihthlak a ni a. Social Welfare Secretary Pi K. Vanlalrawni leh Director Pi Laldikkimi ten thu an sawi a. Chawhnu lamah hian agenda hrang hrang-MCDPOA member hlawh chungchang te, ICDS hnuaia work distribution chungchang te, CO atanga CDPO promotion hmu leh direct-a lut chungchang te leh thu pawimawh tak tak rel a ni.

Mizoramah hian Integrated Child Development Services (ICDS) hnuaiah  Project 27 a awm mek a, heng project hi CDPO ten an kalpui a. District hrang hrang atangin CDPO 19 an kalkhawm a ni.