Vawiin chawhma khan Vanapa Hall-ah Social Welfare Minister Pu P.C Lalthanliana chuan Govt. J Thankima College-in an college a zirlai lo lut tharte lawmluhna hun a buatsaih a hmanpui a. He hunah hian Social Welfare Minister chuan Govt. J.Thankima College magazine “Lelthang” chu a tlangzarh nghal bawk a ni. 

Social Welfare Minister Pu P.C Lalthanliana chuan zirnaa hlawhtlinna bul ber chu college lar leh lar lovah te, building that leh that lovah te innghat lovin a zirtu zirlai ah a inghat zawk a ni, a ti a. Zirlaite chu an hlawhtlinna turah anmahni an pawimawh ber thu sawiin mi an hlawhtlin avanga an hlawhtlinna lai chauh enlova an tumruhna leh thawhrimna en zawk tur a ni, a ti a. School kal lai aia college a zalenna lo tam ta zawk chu hmangsual lova mi puitling taka inchher chhuahna hun atana hmang zawk turin Pu P.C Lalthanliana chuan zirlai lawmluh tharte chu a fuih a. Minister chuan sawrkar hnathawk tur chauh nilova, kut hnathawh lamah ani emaw, sumdawnna lamah emaw eng kawng pawha hlawhtlinna petu atan an zirna chu hmang turin zirlai kalkhawmte a chah bawk a. Zirlai nih laia nawmsak tum hi hlawhchhamna bulpui ani tiin tumruhna leh thawhrimna nen hrehawm huama hlawhtling tura bei turin zirlaite chu Pu P.C Lalthanliana chuan a fuih nghal a ni. 

Govt. J. Thankima College hi 1992 a din niin tun dinhmunah Department paruk awmin zirlai 800 vel an nei a. 2016 khan National Assessment and Accreditation Council (NAAC) chuan college hi endikin C++ grade a pe a ni. Govt. J. Thankima College hian kumin January ni 27 atang khan Bawngkawn Brigade-a an Central Campus thar an luah tan a ni. 

He hunah hian Govt. J Thankima College Principal  Dr. C. Lalremruata chuan kalkhawmte lawmna thu sawiin General Secretary (SU) Lalzuitluanga Hnamte hnen atangin report ngaihthlak a ni a. He hunah hian kum kaltaa zirlai boral ta te sunna hun hman nghal a ni.