UGC bultuma J Buana College Public Administration leh Political Science Dept te buatsaih ni hnih chhung awh tur ‘National Seminar on Governance & Civil Society in North East India’ chu vawiin khan I&PR Conference Hall, Lunglei-ah neih tan a ni a. Seminar hawnna inkhawm hi Dr.Vanlalngaii, Associate Professor, Govt J.Buana College-in a kaihruai.                   

Seminar Convener Dr.Harendra Sinha chuan kal khawmte lawmna thu sawiin Govt J.Buana College Principal Prof.J.Zorema chuan Seminar thupui zau dan te, sawrkar inrelbawlna tha nei tura mipui vantlang pawimawhna leh Mizoramah chuan kohhran leh tlawmngai pawl tha tak tak sawrkar inrelbawlna khalh ngil tura an awm chu vanneih thlak a tih thu a sawi.                   

Seminar hun hnihnaah thupui then hrang hrang hmangin India hmarchhak biala sorkar inrelbawlna leh mipui vantlang nunphung zirchianna neih a ni a. Govt.J.Buana College atanga Resource Person Dr.Vanlalhlani Ralte leh Dr B.Lalrinchhani te chuan hmarchhak state-ah sorkar inrelbawlnaa harsatna hrang hrang awmte an sawifiah a. Dr.D.K.Jha, Lunglei Govt. College; Dr. Rajendra Prasad, Mizoram Polytechnic leh Pu C.Zairemthanga, Asst. Professor, Lunglei Govt College te chuan khawvel pum huapa North East India dinhmun, inrelbawlna leh vantlang nunphung an zirtir a ni.                   

‘Governance and Civil Society in NE India’ seminar-ah hian University leh College hrang hranga zirtirtute leh zirlai engemawzatin Paper an buatsaihte chu zirho a ni bawk a. Vawiina Seminar hawnna inkhawmah hian Lungleia tlawmngai pawl hrang hrang aiawhte, kohhran hruaitute bakah Lungleia mihlun engemawzat an tel a ni.