598/2025-2026

Dated Aizawl the 28th May 2025; Nimin khan Social Welfare Department leh National AYUSH Mission tangkawp buatsaih, kum upate leh ruihhlo ngaite tan, a thlawna inentirna tur ‘Mental Health Clinic & Camp’ chu Dawrpui Multipurpose Centre-ah Pi Lalrinpuii, Minister, Social Welfare Department chuan a hawng a. Dr. Lalhriatzuali Ralte, Director, Social Welfare Department chuan Camp hawnna hun hi a kaihruai a ni.

Social Welfare Minister chuan a department chan pahnih Social welfare leh Health (Directorate of AYUSH) thawhhona a he camp buatsaih a ni hi lawmawm a tih thu a sawi a. Sawrkar chu India danpuiiin Directive Principles of State Policy hnuaia a phut angin mipui tana ding tur a nih thu a sawi a, hemi kawng a mawhphurhna hrang hrang tihlawhtling tur hian theihtawp a chhuah zel tur thu a sawi. Pi Lalrinpuii chuan Sawrkar hnuai a kum upate hamthatna tihpun kawngahte, Sawrkarin ruang phurhna kawnga ruahmanna an siam kaltlanga ruang 666 phurhsak a nih tawh thu te, mipui tan pawisa sen ngai lova inenkawlna tur, Mizoram Universal Health Care Scheme hman chhoh a nih mek thu te leh ruihhlo do nan ‘Demand Reduction’ lamah hma lak mek a nih thu a tarlang bawk a ni.

Ruihhlo avanga harsatna tawkte chu ram hmelma an nih loh thu Minister chuan sawiin heng ruihhlo avanga harsatna tawk mekte chhanchhuak tur hian Sawrkar, Kohhran, tlawmngai pawl leh Home dintute tangruala tul thu Social Welfare Minister chuan a sawi a. Ruihhlo in a tihbuai chhungte pawh beidawng mai lova, Sawrkarin ruahmanna a siamte sawt zawk a kalpui a nih theih nan Sawrkar tha tichaktu nih tum zawk turin a chah a. Mizoram chhung a Centre tihchangtlun leh ‘Detoxification leh Day Care Facility’ lamah tan la turin inruahmanna a kal mek tih a sawi bawk a ni.

Hun kaihruaitu Dr. Lalhriatzuali Ralte, Director, Social Welfare Department chuan kalkhawmte lawmna thu sawiin Mizoram ah mihring za zel a sawm chu kum 60 aia upa (Senior Citizen) an ni a, kum 100 dam thleng mi engemaw zah an awm bawk tih a tarlang a. Kum upate enkawlnan ‘Atal Vayo Abhyuday Yojana’ hnuaiah mobile medical care unit leh physiotherapy unit pek chhuah a nih thu leh mi 10 awm theihna ‘Old age home’ Ainawnah din a nih thu a sawi.

National AYUSH Mission Director Pi S. Mara Thansiami chuan rilru hriselna chu taksa hriselna tluka pawimawh a ni tih sawiin, rilru lama harsatna neite mipuiin kan thlirdan dik lo hi thlak a tul thu a sawi a. Pi Gracy Lalchhanzuali, Deputy Director, Social Welfare Department chuan Maintenance and Welfare of Parents and Senior Citizens Act, 2007 hnuaiah kum upaten enkawlna an dawn chu an chanvo (right) a nih thu leh, kum upate enkawl duh lo chu dan hmanga hrem theih an nih thu a tarlang.

Mizoram Social Defence & Rehabilitation Board Co-ordinator Pi Lalfakawmi chuan Mizoram chu ruihhlo thawnchhuahna kawng anga ngaih thin kha ruihhlo hmang sual tamna ram anga ngaih theiha a awm chu pawi a tih thu a sawi a. Ruihhlo la ti ve lote venghim tur a hmalak a pawimawh thu leh chu hna chu mahni inchhungkhur atanga bultan theuh a tul thu a sawi. He hun ah hian Dr. R. Lalmuanpuia pawhin rilru lam harstana hrang hrang leh mithiam bikte enpuina hnuai a enkawl a pawimawh zia a sawi bawk a ni.

National Programme for Health Care of the Elderly (NPHCE) State Programme Co-ordinator Dr. Martin Chawngsailova chuan khawvel pum huapa mihring dam rei chhung (Life Expectancy) a san zel avangin kum upate an pung tulh tulh dawn tih a sawi a. Kum upate chu rei tak dam ringawt lova, hrisel taka rei tak an dam theih nan zuk leh hmuam laka fihlim turin a chah a. World Health Organisation pawn zuk leh hmuam hi ruihhlo tihtanna (gateway to drugs) bulpui berte zing ah ngaih a nih thu a sawi.

He programme ah hian Social Welfare Department aiawhte, Mizoram Upa Pawl aiawhte, AYUSH aiawhte leh Modern High School leh Apollo Nursing School zirlaite an tel a. Mental health camp hi May ni 27 leh 28 chhung neih tur niin AYUSH doctor te an duty a. Dam lote tan a thlawna inentir a theih bakah damdawi pawh a thlawna sem a ni dawn a ni.